2025 yilning 12 fevral kunidan 1 martiga qadar Xitoyda futbol bo‘yicha U20 yosh toifasida Osiyo kubogi final bosqichi o‘tkaziladi. Mazkur musobaqada O‘zbekiston yoshlar terma jamoasi “S” guruhida Eron, Indoneziya va Yaman termalariga qarshi bahs olib boradi.
Yosh futbolchilarimiz agarda guruh bosqichidan muvaffaqiyatli o‘ta olsa, navbatdagi bosqichda “D” guruhidagi terma jamoalarning biri bilan kuch sishanadi. Shunisi ahamiyatliki, chorak finalda g‘olib bo‘lgan jamoa Osiyo chempionatining yarim final bosqichi bilan bir qatorda 2025 yilning sentyabr-oktyabr oylarida Chilida o‘tadigan Jahon chempionatiga yo‘llanma oladi.
Mazkur nufuzli chempionatda munosib ishtirok etish va mundialga yo‘llanma olish maqsadida Farhod Nishonov boshqaruvidagi O‘zbekiston yoshlar terma jamoasi dekabr-yanvar oylarida Qatarda yig‘in o‘tkazadi. Futbolchilarimiz yig‘in doirasida Saudiya Arabistoni U20 terma jamoasiga qarshi o‘rtoqlik uchrashuvlarida maydonga tushadi. Ushbu o‘yinlar 29 dekabr, 3 yanvar kunlari Doha shahrida bo‘lib o‘tadi.
Yig‘inga jalb etilgan futbolchilar ro‘yxati bilan tanishing:
Darvozabonlar: Samandar Muratbayev, Maksim Murkayev, Muhammadyusuf Sobirov.
Himoyachilar: Azizbek To‘lqinbekov, Ro‘ziboy Fayzullayev, Saidxon Hamidov, G‘iyosjon Rizaqulov, Muhammadali Zohidov, Dilshod Abdullayev, Ozodbek Qurbonov, Behruz Jumatov, Narimon Ahmadjonov, Diyorbek Abdunazarov.
Yarim himoyachilar: Rustambek Fomin, Ravshan Xayrullayev, Muhammadali Reimov, Murodali Usmonov, Ollobergan Karimov, Muhammadali O‘rinboyev, Murod Komilov, Daler Tuxsanov, Muhammadyusuf Mirqodirov,.
Hujumchilar: Saidumarxon Saidnurullayev, Asilbek Jumayev, Abdug‘ofur Haydarov, Nurlan Ibraimov, Amirbek Saidov, Shohrux Abduxalilov.
Ma’lumot o‘rnida: O‘zbekiston U20 yoshlar terma jamoasi dekabr oyi boshlarida Turkiyada ham yig‘in o‘tkazgan edi.
Javohir Toshxo‘jayev,
O‘zA