Toshkent metrosining “Beruniy” bekati Talabalar shaharchasining o‘ziga xos ramziy darvozasi hisoblanadi. Sababi ilm olib, mamlakat kelajagiga xizmat qiladigan yetuk mutaxassis bo‘lib yetishishdek orzu-havaslar ushaladigan Talabalar shaharchasi shu bekat yonidan boshlanadi.

Ushbu mo‘jazgina shaharchadan har yili minglab talaba katta hayotga yo‘llanma oladi. Shu bois mazkur shaharcha bu yerda tahsil olib, yurtimizning barcha hududiga tarqalgan ziyolilar uchun aziz va mukarramdir.

Bugun Talabalar shaharchasini bundan o‘n besh yil oldingi holati bilan mutlaqo taqqoslab bo‘lmaydi. O‘sha kezlarda yotoqxona deb ataluvchi talabalar turar joylarining aksariyati sharoit yo‘qligidan yopib qo‘yilgan, ishlayotganlarining ham yerto‘lasini suv bosib, devorlari ko‘chib tushgan edi. Kutubxona, poliklinika, sport inshootlari eskirib ketgandi.

2005 yili o‘sha vaqtda O‘zbekiston Respublikasi Bosh vaziri lavozimida ishlagan Shavkat Mirziyoev bu yerdagi og‘ir ahvolni ko‘rib, yoshlarimizning yashashi va ta’lim olishi uchun sharoit yaratib bermasa ertaga kech bo‘lishini aytadi, o‘zi bu ishga qat’iy kirishadi. Ammo bu oson ish emasdi. O‘sha paytda buning uchun budjetdan mablag‘ ajratish amrimahol edi. Shunga qaramay, Shavkat Mirziyoev shashtidan qaytmadi, respublika tashkilotlari, homiylarni shaharchani rekonstruksiya qilishga jalb qilish imkonini topa oldi.

Shu tariqa qisqa muddatda shaharchadagi talabalar turar joylari mukammal ta’mirlanib, uch yulduzli mehmonxona darajasida jihozlandi. Muhtasham suv sporti saroyi, Ma’naviyat va ma’rifat markazi, sport zallari, xizmat ko‘rsatish inshootlari qurildi.

Bu ishlarning uzviy davomi sifatida joriy yilda shaharchada keng ko‘lamli bunyodkorlik ishlari olib borildi. Yo‘laklar ta’mirlanib, yoritish ustunlari, o‘rindiqlar o‘rnatildi, 400 o‘rinli avtoturargoh qurildi. Hududga ko‘p yillik va mavsumiy gullar, manzarali daraxt ko‘chatlari ekildi.

Metro bekati oldida parvoz qilayotgan oq kaptarlar ramzi tushirilgan stella qad rostladi. Bu ushbu ilm-fan maskanida yetuk mutaxassis bo‘lib tarbiyalangan yoshlarning hayotga uchirma bo‘layotganiga ishoradir.

Prezidentimiz tashabbusi bilan shaharcha hududining boshlanishida, “Beruniy” metro bekati yonida Beruniy maydoni barpo etildi. Abu Rayhon Beruniyning Texnika universiteti oldidagi haykali shu yerga ko‘chirilib, atrofi obod qilindi. Bular o‘ziga xos majmua hosil qilib, Talabalar shaharchasi ilmiy salohiyatining yana bir ramzi bo‘ldi.

Bugungi kunda Talabalar shaharchasida Mirzo Ulug‘bek nomidagi O‘zbekiston Milliy universiteti, Islom Karimov nomidagi Toshkent davlat texnika universiteti, Oliy va o‘rta maxsus ta’lim vazirligi, Innovatsion rivojlanish vazirligi, Ma’naviyat va ma’rifat markazi, kollej va litseylar, sport majmualari joylashgan. Ikki universitetda qariyb 25 ming talaba tahsil olmoqda.

Davlatimiz rahbari majmuada olib borilgan ishlarni ko‘zdan kechirdi. Alloma haykalining Talabalar shaharchasi boshlanadigan joyga qo‘yilishi mamlakatimizda ilm-fanga qaratilayotgan e’tibor ramzi bo‘lib, bugungi yoshlarda ulug‘ ajdodlardan faxrlanish tuyg‘usini kuchaytirishga xizmat qilishi ta’kidlandi.