Mazkur tanlov O‘zbekiston Respublikasi Xalq ta’limi vazirligi tizimidagi umumiy ta’lim muassasalari o‘qituvchilari o‘rtasida an’anaviy tarzda o‘tkaziladi. Joriy yil ham “Yilning eng yaxshi fan o‘qituvchisi – 2019” respublika tanloviga start berildi.
Tashkilotchilar tomonidan shaffoflikni ta’minlash va keng ommani jarayonga jalb etish maqsadida tanlov nizomiga bir qator o‘zgartirishlar kiritildi. Unga ko‘ra, oliy ma’lumotli, kamida 3 (uch) yillik pedagogik stajli, ikkinchi va undan yuqori malaka toifasiga ega bo‘lgan o‘qituvchilar tanlovda qatnashadi. Ishtirokchilar joriy yilning 18 martidan 5 apreliga qadar Xalq ta’limi vazirligining rasmiy veb-saytida tashkil etilgan sahifada onlayn ro‘yxatdan o‘tadi.
Shuningdek, hujjatlar soni 10 tadan 5 taga qisqartirildi va barchasi elektron shaklga o‘tkazildi. Shartlar 5 tadan 3 taga qisqartirildi. Tanlovni adolatli o‘tkazish uchun hakamlar hay’ati tarkibiga barcha hududlardan teng miqdorda vakil olinadi.
Tanlovning respublika bosqichi g‘oliblari mos ravishda eng kam ish haqining 15, 12, 8 baravari miqdorida bir martalik pul mukofoti bilan taqdirlanadi. Amaliyotga tatbiq etilgan bu o‘zgarishlar o‘zini oqlaydimi? Tanlov jarayonida buni kuzatish va baholash imkoniyatiga ega bo‘lish mumkin.
Barno Meliqulova, O‘zA