Mamlakatimizga tashrif buyurgan Italiya tashqi ishlar va xalqaro hamkorlik vaziri oʻrinbosari Manlio di Stefano Oʻzbekiston bilan Italiya oʻrtasidagi hamkorlik munosabatlari va istiqbollari haqida OʻzA muxbiriga quyidagilarni soʻzlab berdi:

– Oʻzbekistonda amalga oshirilayotgan islohotlar jamiyat ravnaqi uchun juda qulay imkoniyatdir.

Ikki tomonlama hamkorlikni rivojlantirish imkoniyatlari katta. Mamlakatlarimiz iqtisodiyoti bir-birini toʻldiradi. Bu turli tarmoqlarda oʻzaro manfaatli hamkorlikni yoʻlga qoʻyish va rivojlantirishda muhim omil boʻladi.

Ayni paytda qator sohalarda qoʻshma bitimlarni amalga oshirish ustida ishlamoqdamiz. Biz taklif etayotgan loyihalar Oʻzbekistonda ishlab chiqarish korxonalarini har tomonlama qoʻllab-quvvatlash, sayyohlik, madaniy yodgorliklarni asrab-avaylash kabi yoʻnalishlarni qamrab oladi. Biz nafaqat metallurgiya, qishloq xoʻjaligi kabi iqtisodiyotning muhim tarmoqlarida, balki aynan turizm sohasining turli yoʻnalishlarida qoʻshma dasturlarni amalga oshirish orqali yurtingizda iqtisodiy oʻsish surʼatiga erishishga oʻz hissamizni qoʻshish istagidamiz.

Yevropa Ittifoqi bilan hamkorlik darajasida gapiradigan boʻlsam, ayni paytda Markaziy Osiyo davlatlari bilan aloqalarni rivojlantirishga qaratilgan yangi strategiya ustida ish olib borilayapti. Shubhasiz, Oʻzbekiston Markaziy Osiyo mintaqasidagi muhim davlatlardan. Shu maʼnoda, mamlakatingiz bilan barcha sohalarda oʻzaro foydali hamkorlikni yoʻlga qoʻyishdan manfaatdormiz. Bunda hukumatlararo ishchi guruh faoliyati muhim oʻrin tutadi.