– Maqsadimiz mazkur yoʻnalishlarda faoliyat koʻrsatayotgan kompaniyalarni, ular ishlab chiqarayotgan mahsulotlar namoyishini tashkil etib, Oʻzbekiston va xorijiy davlatlar oʻrtasida oʻzaro hamkorlik aloqalarini mustahkamlashdir, – dedi “Iteca Exhibitions” xalqaro koʻrgazmalar kompaniyasi bosh direktori N.Hasanova. – Bu kabi nufuzli tadbirlarni oʻtkazishda bizni har tomonlama qoʻllab-quvvatlab kelayotgan Oʻzbekiston Respublikasi Tashqi savdo vazirligi, Matbuot va axborot agentligi, Savdo-sanoat palatasi va “Oʻzkimyosanoat“ aksiyadorlik jamiyatiga oʻz minnatdorligimizni bildiramiz. Toʻqqizinchi bor oʻtkazilayotgan plastmassa va polimerlar sanoati mahsulotlari namoyishi mamlakatimizdagi shu sohada ish yuritayotgan korxonalar rivojida muhim oʻrin egallasa, oʻzining yigirma yillik faoliyati ega qadoqlash va bosma ishi koʻrgazmasi tayyor qadoq va qadoqqa belgi qoʻyish boʻyicha mahalliy va xorijiy qadoqlash texnikasi ishlab chiqaruvchi va yetkazib beruvchilar maqsadini yanada birlashtirmoqda.

Taʼkidlash kerakki, “Plastmassa va polimerlar sanoati – Plastex Uzbekistan” xalqaro koʻrgazmasida doimiy ishtirokchilar qatorida Oʻzbekiston, Germaniya, Janubiy Koreya, Hindiston, Xitoy kabi davlatlardan yangi kompaniyalar ham qoʻshilmoqda.

Xitoydagi “Jing Hong” plastmassa mahsulotlariga qolip ishlab chiqaruvchi korxona ham bu koʻrgazmada birinchi bor qatnashmoqda.

– Korxonamiz oʻn ikki yildan buyon faoliyat koʻrsatadi, – dedi ushbu korxona bosh direktori Leo Vang. – Oʻtgan yillar mobaynida korxonamiz mahsulotlari Xitoyda ham oʻz oʻrnini egallab ulgurdi. Raqobat juda kuchli, lekin biz bundan qoʻrqmay, ildam qadam tashlayveramiz. Bugungi kunda avtomobil ehtiyot qismlari, turli kichik hajmdagi trubalar, stol-stullar, uy-roʻzgʻor buyumlari kabi plastmassa mahsulotlarga qoliplar ishlab chiqaramiz. Yurtingizda oʻtkazilayotgan koʻrgazmaga ilk bor qatnashyapmiz va bu ulkan samara berishiga ishonamiz.

Qadoqlash va bosma ishi boʻyicha taklif etilayotgan mahsulotlar ham tomoshabinlar diqqatini tortmoqda. Ayniqsa, bu yerda qadoq, belgi va bosma ishi, qogʻoz kesish mashinasi, fleksbosma uchun avtomat uskuna, inyeksiyali quyish mashinasi, kitob korpusini tayyorlash uchun avtomatik mashina, babinali-kesish mashinasi kabi koʻplab zamonaviy asbob-uskunalar namoyishi mahalliy va xorijiy ishlab chiqaruvchi va yetkazib beruvchilarni xaridorlar bilan yaqin aloqalar oʻrnatishga imkon yaratmoqda.

– Koʻrgazmaga ishtirok etish uchun Surxondaryodan keldik, – dedi “Denov bosmaxona” masʼuliyati cheklangan jamiyati rahbari M.Joʻrayev. – Oʻtgan gal Hindistondagi “Rotoffset” kompaniyasidan rulon ofset sotib olgan edik. Bu yerda bosmaxonamiz uchun zarur boʻlgan uskunalar olish niyatida yana shu kompaniya vakillari bilan uchrashishga hamda sohadagi xalqaro yangiliklar bilan tanishishga muvaffaq boʻldik.

Koʻrgazmada oziq-ovqat va ichimliklar, nooziq-ovqat tovarlari, kosmetika va dori vositalari, qurilish mollari, sanoat mahsulotlari ishlab chiqaruvchilari xorijiy kompaniyalar qatorida “Polimaks”, “Uzpolitex Holding”, “Poytaxt savdo group”, “Tezkor matbaa” kabi mahalliy bozo

rning yetakchilari faol ishtirok etmoqda.

Aytish joizki, mazkur koʻrgazmalar yurtimizda ishlab chiqarilgan mahsulotlar eksportiga keng yoʻl ochish barobarida kimyo, meva-sabzavot, farmatsevtika, toʻqimachilik mahsulotlarini ishlab chiqarish texnologiyalari va xomashyolarga investitsiyalar kiritish imkoniyatini yaratadi.

Koʻrgazmalar namoyishi 5-oktyabrga qadar davom etadi.