Mamlakatimizda Prezidentimiz Shavkat Mirziyoyev boshchiligida ma’rifat va diniy bag‘rikenglik masalalariga alohida e’tibor berilmoqda. Keyingi yetti yilda soha bo‘yicha 50 dan ortiq qonun hujjati qabul qilindi.
O‘zbekistonning millatlararo va konfessiyalararo totuvlikni o‘rnatish siyosati Inson huquqlari umumjahon deklaratsiyasi va boshqa xalqaro huquqiy-me’yoriy hujjatlarga to‘la mos keladi.
Bu fikrlar Oliy Majlis Senati Raisi Tanzila Norboyevaning Musulmon oqsoqollar kengashi bosh kotibi Muhammad Abdusalom bilan muloqotida qayd etildi.
Uchrashuvda Musulmon oqsoqollar kengashi bilan keng ko‘lamli aloqalarni mustahkamlash, diniy bag‘rikenglik hamda an’anaviy islom qadriyatlarini mustahkamlash borasida hamkorlikni kengaytirish masalalari muhokama qilindi.
Ma’lumot o‘rnida aytib o‘tish joizki, yurtimizda turli millat va din vakillarining o‘z salohiyatini to‘laqonli amalga oshirishi, ularning huquq va manfaatlarini himoya qilish uchun konstitutsiyaviy kafolatlar ta’minlangan. O‘zbekiston musulmonlari idorasi, uning hududlardagi vakilliklari, 3 ta oliy va 10 ta o‘rta maxsus ta’lim muassasasi hamda 16 ta konfessiyaga tegishli 2,3 mingdan ortiq diniy tashkilot faoliyat yuritmoqda.
Muhammad Abdusalom O‘zbekiston Prezidentining BMT Bosh Assambleyasining «Ma’rifat va diniy bag‘rikenglik» maxsus rezolyutsiyasini qabul qilish tashabbusi xalqaro maydonda ham e’tirof etilayotgani, hujjat mazkur yo‘nalishdagi sa’y-harakatlarni birlashtirishga turtki bo‘lganiga alohida to‘xtaldi.
O‘zbekistonning butun dunyo musulmonlari uchun juda katta ahamiyatga molik ekani, ushbu yurtdan yetishib chiqqan olimlar nafaqat musulmon olamiga, balki butun dunyo uchun ham katta ilmiy meros qoldirgani ta’kidlab o‘tildi.
Uchrashuv yakunida o‘zaro aloqalarni yanada kengaytirish, delegatsiyalar tashriflarini amalga oshirish, birgalikda turli ilmiy va amaliy tadbirlarni tashkil etishga kelishib olindi.
N.Abduraimova, O‘zA