Davra suhbati doirasida Yevroosiyo taraqqiyot banki rahbari va mas’ul vakillari ishtirokida matbuot anjumani bo‘lib o‘tdi. Shuningdek, “Markaziy Osiyoda irrigatsiya va suv resurslari”, “Xalqaro moliyaviy institutlarning ekologik va ijtimoiy standartlari”, “Markaziy Osiyoda loyihalarni amalga oshirishda xalqaro tashkilotlar va moliya institutlari hamkorligining amaliy misollari” mavzularida muhokamalar ham bo‘lib o‘tdi.
Ma’lumot uchun, Yevroosiyo taraqqiyot banki 2006 yilda tashkil etilgan bo‘lib, uning faoliyati Yevroosiyo mamlakatlarida iqtisodiyot, savdo-iqtisodiy aloqalar va integratsiyaviy jarayonlarni rivojlantirishga yo‘naltirilgan. Ushbu xalqaro moliyaviy tashkilot aholining turmush darajasini oshirish, biznes, moliya muhitini rivojlantirishga qaratilgan investitsiya loyihalarini moliyalashtiradi.
2020 yilda Yevroosiyo taraqqiyot banki huzurida Raqamli tashabbuslar jamg‘armasi tashkil etildi. Uning asosiy maqsadi raqamli transformatsiya jarayonida Yevroosiyo taraqqiyot bankiga a’zo mamlakatlarni qo‘llab-quvvatlashdir. Jamg‘arma sog‘liqni saqlash, savdo, davlat boshqaruvi, madaniyat, turizm, sport, ta’lim, ekologiya, energetika, atrof-muhitni muhofaza qilish, ma’lumotlarni himoya qilish, transport, logistika, sanoat, qishloq xo‘jaligi, mehnat bozori va migratsiya, shuningdek, moliyaviy texnologiyalar va «aqlli shaharlar» kabi sohalardagi raqamli loyihalarni amalga oshirishga ko‘maklashadi.
Yevroosiyo taraqqiyot banki portfelida transport infratuzilmasi, raqamli tizimlar, “yashil” energetika, qishloq xo‘jaligi, sanoat va mashinasozlik yo‘nalishlaridagi loyihalar asosiy o‘rinni egallaydi.
A.Mashrabxanov, O‘zA
Olma-ota, Qozog‘iston