Ko‘rgazmaning ochilish marosimida Prezident qutlovini O‘zbekiston Respublikasi Bosh vazirining o‘rinbosari N.Otajonov o‘qib eshittirdi.

Qutlovda O‘zbekiston va Turkmaniston – strategik sheriklar ekani, xalqlarimizni ko‘p asrlik do‘stlik va yaxshi qo‘shnichilik rishtalari, umumiy tarix, din va til, madaniyat, urf-odat va an’analar mushtarakligi bog‘lab kelayotgani, bugungi kunda mamlakatlarimiz biznes hamjamiyatlari o‘rtasidagi izchil ishbilarmonlik aloqalari hamda hududlararo mustahkamlanib borayotgan hamkorlik doirasida keng istiqbollar ochilayotgani ta’kidlangan.

Turkmaniston Respublikasi tashqi iqtisodiy aloqalar va savdo vaziri D.O‘rozmurodov turkmanistonlik ishbilarmonlar uchun O‘zbekiston muhim savdo-iqtisodiy hudud ekani, Buyuk ipak yo‘lining savdo-sotiq rivojlangan manzilida joylashgan mamlakatlarimiz tadbirkorlari hamkorligining mustahkamlanib borayotgani esa teng manfaatli rivojlanishda muhim ahamiyat kasb etishini qayd etdi.

O‘zbekiston – Turkmaniston hamkorlik munosabatlari yangi bosqichda mustahkamlanib bormoqda. Bu borada ikki davlat rahbarlarining oliy darajadagi uchrashuvlari chog‘ida erishilgan kelishuvlarning birgalikda amalga oshirilayotgani hal qiluvchi ahamiyat kasb etmoqda.

Ayniqsa, keyingi yillarda o‘zaro savdo hajmi sezilarli oshdi. Turli iqtisodiy tarmoqlarda kooperatsiya aloqalari yuksaldi. Bundan bir oy oldin Ashxobodda Turkmaniston Prezidentining bevosita qo‘llab-quvvatlashi bilan o‘tkazilgan O‘zbekiston milliy sanoat ko‘rgazmasi va unda erishilgan ko‘p qirrali kelishuv bitimlari fikrimiz dalilidir.

Turkmaniston milliy ko‘rgazmasida neft va kimyo, to‘qimachilik, tibbiyot sanoati, qishloq xo‘jaligi va oziq-ovqat mahsulotlari, qurilish mollari, transport va logistika, sport va turizm, ilmiy-texnika, ta’lim sohasidagi yutuqlar, xizmatlar namoyish etilmoqda. Turkman gilamlari, kasanachilik, baliqchilik sanoati, dunyoga mashhur axaltekin otlari naslchiligi tadqiqotlari katta qiziqish uyg‘otmoqda.

Turkmanistonda baliqchilik sanoati rivojlanishining asosiy manbai Kaspiy dengizi hisoblanadi. Bugun mamlakat suv havzalarida baliqning 50 dan ortiq turini uchratish mumkin.

– Turkmanistonda baliq va dengiz mahsulotlarini qayta ishlash sanoati yaxshi rivojlangan. Tadbirkorlarimiz baliq va baliq mahsulotlarini qo‘shni respublikalarga eksport qiladi, – deydi Turkmaniston Baliq sanoati davlat qo‘mitasi bo‘lim boshlig‘i Gayir Gayipov. – Ko‘rgazmada xususiy tadbirkorlarimiz ham ishtirok etmoqda. Ular O‘zbekiston bozorini o‘rganib, hamkorlik qilish istagida kelishgan. Xususan, o‘zbekistonlik hamkasblarimizning baliqchilik sohasida zarur xomashyo mahsulotlari, qadoqlash moslamalari, yangi texnologiyalar ishlab chiqarish tajribasini o‘rganishni rejalashtirganmiz.

Prezident Gurbanguli Berdimuhamedov taklifi bilan 2018 yil mamlakatda “Turkmaniston – Buyuk ipak yo‘lining yuragi” degan shior bilan o‘tmoqda. Bunda mamlakatda turizmni rivojlantirishga ham asosiy e’tibor qaratilmoqda. Ko‘rgazmada Turkmaniston Turizm davlat qo‘mitasi vakillari ishtirok etmoqda.

– Mamlakatimizda turizmni rivojlantirish bo‘yicha keng ko‘lamli ishlar amalga oshirilmoqda. Bizda ajoyib sayyohlik manzillari bor. Kaspiy sohilidagi “Avaza” milliy sayyohlik zonasida 200 dan ziyod mehmonxona, ajoyib dam olish manzillari sayyohlar xizmatida, – deydi Turkmaniston Turizm davlat qo‘mitasi bo‘lim boshlig‘i Islom Avezov. – Turkmaniston va O‘zbekiston o‘rtasida turizmni rivojlantirishda uzoq yillardan buyon hamkorlikda ishlab kelamiz. Keyingi yillarda bu borada juda yaxshi natijalarga erishdik. Bugungi kunda Yevropa, Sharqiy Osiyo va boshqa mamlakatlardan Buyuk ipak yo‘li yo‘nalishida sayohatga chiqqan sayyohlarning Turkmaniston orqali Xorazm, Buxoro viloyatidagi qadimiy shaharlarga hamda O‘zbekiston orqali Turkmanistonga tashrifi amalga oshirib kelinmoqda. Bugun bu boradagi hamkorlik aloqalarini yanada mustahkamlashga ishonamiz.

Turkmaniston milliy ko‘rgazmasi yakunida iqtisodiy aloqalar yanada rivojlanishi, ikki mamlakat ishbilarmonlari o‘rtasida o‘zaro manfaatli kelishuvlarga erishilishi kutilmoqda. Bu jihatlar azaliy do‘st xalqlarimiz o‘rtasida mehr rishtalarini tobora mustahkamlaydi.