Poytaxtimizda boks bo‘yicha nufuzli turnir bo‘lib o‘tdi – Jahon boks seriyasi (WSV) VIII mavsumi guruh bosqichida “Uzbek Tigers” jamoasi Kubaning “Cuba Domadores” jamoasiga qarshi jang o‘tkazdi. 

Xalqaro havaskor bokschilar uyushmasi (AIBA) tomonidan tashkil etilgan turnirning bu yilgi bahslarida jamoalar uch mintaqaga bo‘lingan holda o‘zaro kuch sinashmoqda. “Uzbek Tigers” Amerika mintaqasidagi bahslarda ishtirok etmoqda. Bokschilarimiz “Colombia Heroicos” (Kolumbiya), “Cuba Domadores” (Kuba) va “Caciques de Venezuela” (Venesuela) kabi kuchli jamoalar vakillari bilan bellashmoqda.

Guruh uchrashuvlarining dastlabgi bahsida “Uzbek Tigers” safarda Kubaning “Cuba Domadores” jamoasidan mag‘lub bo‘lgan edi. Bu safar esa ikki jamoa vakillari “Universal” sport majmuasida ringga ko‘tarildi.

49 kilogramm vazn toifasida Hasanboy Do‘smatov Oskar Argilagos Perezni, keyingi bahslarda Shahobiddin Zoirov Robaysi Ramirezni (56 kilogramm), Isroil Madrimov Arlen Lopez Kardonani (75 kilogramm), Sanjar Tursunov esa Erislandi Savonni mag‘lubiyatga uchratdi. Yosh bokschimiz Iqboljon Xoldorov Endi Kruz Gomesga imkoniyatni boy berdi. Shu tariqa “Uzbek Tigers” va “Cuba Domadores” jamoalari o‘rtasidagi bahs 4:1 hisobida bokschilarimiz foydasiga hal bo‘ldi.

– Har bir jangga qattiq tayyorgarlik ko‘rmoqdamiz, – dedi Isroil Madrimov. – Raqib jamoaning har bir bokschisi ringda qanday harakat qilishini kuzatib keldik. Natijada muhim g‘alaba qo‘lga kiritildi. Umid qilamizki, kelgusi bahslarda ham muvaffaqiyatli ishtirok etamiz.

Endi “Uzbek Tigers” jamoasi 1 mart kuni “Colombia Heroicos” bilan Toshkentda raqobatlashadi.

– O‘zbekiston WSV – Jahon boks seriyasi yo‘nalishi bo‘yicha VIII mavsum uchrashuvlarini yuqori saviyada tashkil etganidan mamnunmiz, – dedi turnir supervayzeri Pet Fiakko (Kanada). – Bu mamlakatingizda sportni rivojlantirishga qaratilayotgan yuksak e’tibor, nufuzli musobaqalarni o‘tkazish borasida katta tajriba to‘planganidan dalolatdir.