Усы жыл 12-май күни Қарақалпақстан Жазыўшылар аўқамы тәрепинен ҳәр айда өткерилип киятырған «Талантлылар мектеби» семинары өткерилди.
Оған белгили жазыўшы-шайырлар, мектеп оқыўшылары ҳәм ҳәўескер жаслар қатнасты.
Семинарда Өзбекстан Жазыўшылар аўқамы тәрепинен республикалық жас дөретиўшилердиң дәстүрий тәризде өткерилип киятырған «Зомин» семинары ҳәм семинар шеңберинде өткерилген Орайлық Азия мәмлекетлери дөретиўши жасларының онлайн- форумы қатнасыўшылары-Айжамал Кенжебаева, Асия Айтбаева, Азиза Өмирбаева ҳәм Турсынай Мухитдиновалар сертификат ҳәм қымбат баҳалы саўғалар менен сыйлықланды.
– «Талантлылар мектеби» семинарына төрт жылдан берли турақлы қатнасып келмектемен. Бул жерде жүзден аслам талант ийелери балалар әдебияты, поэзия, проза, драматургия жанрлары бойынша топарларға бөлинип, устаз жазыўшы-шайырлардан көплеген мағлыўматларды үйренип атырмыз. Онлайн-форумға проза жанрындағы дөретпелерим менен қатнастым ҳәм мийнетлеримди мүнәсип баҳалады. Буннан жүдә қуўанышлыман, – дейди семинар қатнасыўшысы Асия Айтбаева. Бундай семинарлар жас талант ийелериниң дөретиўшилиги буннан былай да раўажланыўына хызмет етеди.
Т.СЕЙТНАЗАРОВА,
Қарақалпақстан хабар агентлигиниң шолыўшысы