Футбол бойынша Германия Бундеслигасының 33-турында “Бавария” “Лейпциг”ке қарсы ойнады.
Ушырасыўдың 25-минутында Серж Гнабри есапты ашты. Биринши бөлим мюнхенлилердиң минимал үстинлигинде жуўмақланды. Екинши бөлимде мийманлар жақсы ойын көрсетти. Дәслеп, 64-минутта Конрад Лаймер есапты теңлестирди. 76-минутта Кристофер Нкунку “Лейпциг”тиң екинши голын урды. 86-минутта Доминик Собослаи пеналтиден дурыс пайдаланып, есапты исенимли көриниске алып келди.
“Лейпциг” упайлары санын 63 ге жеткерип, 3-орынға беккем жайғасып алды. “Бавария” болса 68 упай менен биринши орында қалды. Бирақ, екинши орындағы “Боруссия Д” өз ойынында жеңиске ериссе, биринши орынға шығып алады.
Азизбек Дабылов,
ҚМУ Интернет журналистикасы
тәлим бағдарының 4-курс студенти,
Қарақалпақстан хабар агентлиги