Күни кеше футбол бойынша өткерилип атырған Европа Лигасыныӊ 1/8 финал басқышынан орынн алған ойынлар болып өтти.
Онда Хави басшылығындағы «Барселона» Италияныӊ «Наполи» клубы футболшыларын өз майданында қабыл етти. Қызғын болып өткен ушырасыўдыӊ 29-минутында мийманлардыӊ польшалы Петр Зеленский өз командасын алдыға алып шыққан болса, 59-минутта Ферран Торрес «Барселона»ныӊ жуўап тобын «Наполи» дәрўазасына анық жоллап, каталонларды жеӊилистен қутқарып қалды.
Өзбекстан сайланды командасы ағзасы Жасур Яхшибаевты тийкарға қурамда түсирген Молдованыӊ «Шериф» клубы «Брага» менен өз-ара күш сынасты.
Онда «Шериф» Себастьян Тилл ҳәм Адама Траореныӊ «Брага» дәрўазасына урған голлары есабынан 2-0 есабында жеӊиске еристи. Жасур Яхшибаев болса, бул ойында 89 минут ҳәрекет етти.
Ал, Дортмундтыӊ «Боруссия» клубы болса, Шотландияныӊ «Рейнжерс» футболшылары менен ушырасып, күтилмегенде мийманларға 2-4 есабында жеӊилип қалды.
Сондай-ақ, Россияныӊ «Зенит» футболшылары да Испанияныӊ «Бетис» клубы ағзаларына өз майданында 2-3 есабында жеӊилиске ушырады.
Адилбай Оразов,
Қарақалпақстан хабар агентлиги шолыўшысы