Бүгин Қытай пайтахты Пекин қаласында өткерилип атырған қысқы олимпиада ойынларында бир қатар спорт түрлери бойынша жарыслар болып өтпекте.
Атап айтқанда, ерлер арасында лыжада 15 км аралыққа жарыс болып өтип, онда финландиялы Ийво Нисканен 37 минут 54,8 секундта жетип келип, алтын медальды қолға киргизген болса, халықаралық Олимпиада комитети атынан шығып атырған россиялы Александр Большунов 38 минут 18 секунд ўақыт көрсеткиши менен гүмис, Норвегиялы Йоханнес Хёсфлот Клево 38 минут 32,3 секунд ўақыт көрсеткиши менен қола медальларды ийелеўге миясар болды.
Сондай-ақ, кёрлинг бойынша ҳаял-қызлар командасында АҚШлы спортшылар Қытай сайланды командасын 8-4 есабында, канадалы қызлар япониялы қарсыласларын 5-8, швейцариялылар болса россиялыларды 8-7 есапларында жеӊип шыққан болса, Қубла Корея сайланды командасы уллибританиялы қызларды 9-7 есабында жеӊип шығыўға миясар болды.
Бүгин сондай-ақ, конкиде жуўырыў, трамплиннен секириў, шорт-трек бойынша қызықлы жарыслар болып өтеди.
Адилбай Оразов,
Қарақалпақстан хабар агентлиги шолыўшысы