Өзбекстан Республикасы Президентиниң «2021-2022-оқыў жылында Өзбекстан Республикасының Жоқары билимлендириў мәкемелерине оқыўға қабыл етиўдиң мәмлекетлик буйыртпасы параметрлери ҳаққында»ғы қарарына тийкарланып быйылғы оқыў жылынан баслап, айрықша талант талап етилетуғын бакалавриат тәлим бағдарларына оқыўға қабыл етиўде абитуриентлерден кәсиплик (дөретиўшилик) имтиханлардан соң мәжбүрий үш пәннен – ана тили (өзбек, рус яки қарақалпақ тили), математика ҳәм Өзбекстан тарийхы пәнлери бойынша Мәмлекетлик тест орайы тәрепинен тест сынақлары өткерилиўи белгиленген.
Өзбекстан мәмлекетлик көркем өнер ҳәм мәденият институты Нөкис филиалы абитуриенлери ушын кәсиплик (дөретиўшилик) имтиханлар усы жыл 30-июльден 7-август күнлери аралығында өткерилиўи режелестирилген.
Атап айтқанда, күндизги тәлим бағдар бойынша 30-июль күни «Профессионал тәлим (Халық дөретиўшилиги (Вокал атқарыўшылығы))» тәлим бағдарына, 31-июль күни «Техноген көркем өнери (Кино, телевидение ҳәм радио сес режиссёрлығы)» тәлим бағдарына, 31-июль ҳәм 1-август күнлери «Халық дөретиўшилиги (Қосық ҳәм аяқ ойын) тәлим бағдарына», 1-август күни «Кино-телеоператорлық» тәлим бағдарына, 2-август күни «Көркем өнертаныў (Сахна ҳәм экран көркем өнери драматургиясы)», «Профессионал тәлим (Халық дөретиўшилиги (Саз әсбап атқарыўшылығы))» ҳәм «Халық дөретиўшилиги (Фольклор ҳәм этнография)» тәлим бағдарларына, 3-август күни «Режиссура (Драмалық театр режиссёрлығы)» тәлим бағдарына, 4-6-август күнлери аралығында «Актёрлық көркем өнери (Драма театры ҳәм кино актёрлығы)» тәлим бағдарынан дөретиўшилик имтиханлар болып өтеди.
Сондай-ақ, сыртқы тәлим бағдар бойынша 3-4-август күнлери «Көркем өнертаныў (Сахна ҳәм экран көркем өнери драматургиясы)», 5-7-август күнлери «Халық дөретиўшилиги (Қосық ҳәм аяқ ойын)» тәлим бағдарларынан дөретиўшилик имтиханлар болып өтиўи жобаластырылған.
Дөретиўшилик имтиханлардың ашық-айдын ҳәм жәриялылық түрде болып өтиўи ушын имтихан өткерилетуғын аудиторияларға арнаўлы камералар орнатылған болып, интернет тармағындағы https://imtihon.edu.uz/Qoraqalpog’iston/42 мәнзили арқалы бақлап барыўыңыз мүмкин. Барлық абитуриентлерге тест сынақлары ҳәм кәсиплик (дөретиўшилик) имтиханларынан табыслы өтип, студент болыў бахтына ерисиўине тилеклеслик билдиремиз.
ӨзМКӨМИ Нөкис филиалы баспасөз хызмети.
Қарақалпақстан хабар агентлиги.