Нөкисте «Өзбекстан кәсиплик аўқамлары Федерациясы сыйлығының лауреаты» таңлаўының Қарақалпақстан Республикасы басқышы болып өтти.
Елимиз ғәрезсизлигиниң 30 жыллығы байрамы мүнәсибети менен Өзбекстан кәсиплик аўқамлары Федерациясы және Өзбекстан Республикасы Халық билимлендириў министрлиги математика, физика, химия, биология, инглис тили, информатика ҳәм мәлимлеме технологиялары пәнлери муғаллимлери арасында республикалық таңлаў өткермекте. Илаждан гөзленген тийкарғы мақсет, узақ жыллық мийнети арқалы қәбилетли оқыўшыларды тәрбиялап атырған муғаллимлерди қоллап-қуўатлаў ҳәм оларды қосымша хошаметлеўден ибарат.
Таңлаўдың биринши басқышында Қарақалпақстан Республикасынан инглис тили пәнинен 124, математикадан 162, информатика ҳәм мәлимлеме технологиялары пәнинен 58, химиядан 19, биология пәнинен 46, физикадан 57, жәми 466 муғаллимниң ҳүжжети қабыл етилди. Соннан 188 муғаллим екинши басқышқа жоллама алды.
Қарақалпақстан Республикасы басқышында инглис тилинен Нөкис қаласындағы 46-санлы қәнигелестирилген мәмлекетлик улыўма билим бериў мектебиниң муғаллими Дилназ Дүйсенбаева, математикадан Нөкис қаласындағы 22-санлы қәнигелестирилген мәмлекетлик улыўма билим бериў мектебиниң муғаллими Дәўлетбай Даўимов, информатика ҳәм мәлимлеме технологиялары пәнинен Төрткүл районындағы 13-санлы улыўма билим бериў мектебиниң муғаллими Жорабек Хожаев, химиядан Төрткүл районындағы 68-санлы улыўма билим бериў мектебиниң муғаллими Илҳам Худайбергенов, биология пәнинен Төрткүл районындағы 68-санлы улыўма билим бериў мектебиниң муғаллими Уткир Шерипов, физикадан Төрткүл районындағы 64-санлы улыўма билим бериў мектебиниң муғаллими Санжар Шерипов ҳәм Елликқала районындағы 2-санлы қәнигелестирилген мәмлекетлик улыўма билим бериў мектебиниң муғаллими Хусинбой Кенжаев биринши орынларды ийеледи.
Жеңимпазлар усы жыл сентябрь айында болып өтетуғын үшинши басқышқа жоллама алды. Еслетип өтемиз, ҳәр бир номинация бойынша биринши орын ийелери «Өзбекстан кәсиплик аўқамлары Федерациясы сыйылығының лауреаты» көкирек белгиси ҳәм 30 миллион сум, екинши орынды ийелегенлер арнаўлы диплом ҳәм 20 миллион сум, үшинши орынды ийелегенлер арнаўлы диплом ҳәм 10 миллион сум пул менен сыйлықланады.
Д.АБИБУЛЛАЕВ,
Қарақалпақстан хабар агентлигиниң шолыўшысы
М.ҲӘБИБУЛЛАЕВтың түсирген сүўретлери