Жас әскерий қәнигелерге сертификатлар тапсырылды

Президентимиздиң 2018-жыл 12-декабрьдеги «Жасларды ўатансүйиўшилик руўхында ҳәм физикалық тәрбиялаў ҳәм шақырылыўшыларды әскерий-техникалық қәнигеликлер бойынша таярлаў тәртибин жетилистириў бойынша қосымша илажлар ҳаққында»ғы қарарына муўапық Өзбекстан Республикасы қорғаныўына көмеклесиўши «Ватанпарвар» шөлкеминиң айырым билимлендириў мәкемелерин ҳәм автодромларды олардың тийкарғы қураллары, оқыў ҳәм материаллық-техникалық базасы менен биргеликте оператив басқарыў ҳуқықы тийкарында Қорғаныў министрлиги қабыл етип алған еди.

Қарақалпақстан Республикасы Қорғаныў ислери басқармасы жанындағы шақырылыўшыларды әскерий-техникалық қәнигеликлер бойынша таярлаў орайы өз жумысын 2019-жылдан баслап, бүгинги күнге шекем жүзлеген таяр қәнигелерди Қураллы Күшлер қатарына жеткерип берди.

Орай армия ушын «В» ҳәм «С» категориясындағы жеңил ҳәм аўыр әскерий автомобильлерди басқаратуғын айдаўшылар, «Дизельши-электрик» «Аспазлар»ды жетистириў менен бирге жасларды руўхый-әдеп-иркамлылық ҳәм әскерий-ўатансүйиўшилик руўхында тәрбиялап келеди.

Орайда билим алып атырған курсантлардың азық-аўқат, кийим-кеншек ҳәм турмыслық тәмийнаты мәмлекетлик бюджет тәрепинен қапланады. Ҳәр жылы орай 110 қарақалпақстанлы жасларға тәлим-тәрбия берип, кәсипке оқытады ҳәм армия қатарына кетиў ушын таярлап береди. Оқыў мүддети үш ай болып, онда анық, гуманитар-социаллық, техникалық ҳәм басқа да пәнлер менен бир қатарда дәслепки әскерий таярлық та оқытып барылады. Демек, бул жерди тамамлаған жаслар әскерлер турмыс тәризине бираз үйренисип, армия қатарларына жол алады.

Орайда оқыўшылардың гезектеги питкериўи мүнәсибети менен салтанатлы мәресим болып өтти. Онда Арқа-батыс әскерий округи әскерлери сәркардасының биринши орынбасары – штаб баслығы подполковник Дилшод Илхомов, Қарақалпақстан Республикасы Қорғаныў ислери басқармасының хызметкерлери, әскерий хызметкерлер, Қураллы Күшлер ветеранлары ҳәм питкериўшилердиң жақынлары қатнасты.

Мәресимде әскерий хызметке шекем таярлық курсларын өтеген ҳәм қәнигеликке ийе болған 53 жасқа тийисли сертификатлар салтанатлы түрде тапсырылды. Илажда үлгили минез-қулқы, оқыўда ерискен жетискенликлери менен айрықша көзге түскен бир топар жаслар администрацияның мақтаў жарлықлары менен сыйлықланды.

Нөкис гарнизоны әскерий оркестри, әскерий бөлим ҳүрметли қараўыл взводы ҳәм орай питкериўшилери тәрепинен таярланған көргизбели шығыўлар салтанатқа байрам кейпиятын бағышлады. Қәнигеликке ийе болған жаслар ана Ўатанды көздиң қарашығындай қәстерлеп сақлаўға, елимиз, халқымызға хызмет етиўге ўәде берди.

Орайда курсантлардың сапалы билим алыўы ҳәм қәнигелик ийелеўи ушын 10 нан аслам оқыў ханасы, пневматикалық мылтықтан оқ атыў ушын тир, техникаларды сақлаў бокслары, спорт залы, китапхана, жатақхана, асхана ҳәм басқа да турмыслық имаратлар бар. Теориялық билимлерди әмелиятта беккемлеў системасының нәтийжели болыўын тәмийинлеў ушын орайдағы лабораторияларда оқыў-шынығыў техникаларынан кеңнен пайдаланылады. Тәлим-тәрбия процесине 8 оқытыўшы ҳәм 4 инструктор тартылған болып, жаслар менен ҳәм топарда, ҳәм индивидуал түрде ислесиў принципи тийкарында сабақлар алып барылмақта.

Үш бағдарда билим алып атырған курсантлар топарының ҳәр биринде 20 жас билим алады. Усы билимлендириў мәкемесин тамамлаған курсантлар бириншилер қатарында билим алған қәнигелиги бойынша мүддетли әскерий хызметке алынады. Техникаларды әмелий басқарыўды үйретиў ушын орайда 3 жүк ҳәм 2 автомобиль бар. Нөкис қаласының шетинде жайласқан автодром ҳәм мәкемедеги майданда турақлы шынығыўлар әмелге асырылады. Әлбетте, онда алдын курсантлар шынығыўларды электрон тренажёрларды орынлап, буннан кейин ғана шеберлигин дала-оқыў майданында беккемлейди.

Курсантлардың физикалық бәркамал болып камалға келиўи ҳәм саламат турмыс тәризин әдет етип барыўы ушын орайдың жанында жумыс алып барып атырған бокс, қол урысы, оқ атыў спорты, авиамодельшилик дөгереклериниң орны әҳмийетли болмақта. Турақлы өткерилип атырған жарыс ҳәм таңлаўлар болса бөлимлерде саламат, бәсекиге шыдамлы орталықты тәмийинлеп, жасларда жетекшилик қәбилетиниң қәлиплесиўине үлес қоспақта. Китапханадағы китапқумарлық кешелери, курсантлардан ибарат көркем ҳәўескерлик дөгереги тәрепинен таярланып атырған ҳәм өзинде миллий үрп-әдет ҳәм дәстүрлерди сәўлелендирген көргизбели шығыўлар Нөкис қаласындағы көплеген билимлендириў мәкемелеринде көрсетилмекте. Орайда билим алыў ушын талабанлар районлық, қалалық қорғаныў ислери басқармасына мүрәжат етиўи ҳәм белгиленген сайлап алыў басқышларынан өтиўи керек болады. Ең жақсылары усы билимлендириў мәкемелерине оқыўға қабыл етиледи.