Усы жыл 17-20-март күнлери аралығында пайтахтымыздағы республикалық ойын түрлери ҳәм жеңил атлетика бойынша қәнигелестирилген балалар ҳәм жас өспиримлер спорт мектебинде «Жасларды қоллап-қуўатлаў ҳәм халықтың саламатлығын беккемлеў жылы»на бағышлап спорттың теннис түри бойынша 2007-2008-2009-2010-жыллары туўылған ер балалар ҳәм қызлар арасында Нөкис қалалық Мәмлекетлик салық инспекциясының кубоги ушын жарыс өткерилмекте.
Жарыстың ашылыў салтанатында Нөкис қаласы ҳәкиминиң биринши орынбасары К.Калимбетов, қалалық мәмлекетлик салық инспекциясы баслығы С.Уснатдинов ҳәм басқалар шығып сөйлеп, жас спортшыларға әўмет тиледи.
Төрт күн даўам ететуғын қызғын беллесиўлерде 100 ге шамалас жас спортшылар кубок ушын кортқа түседи.
Жарыс халықаралық теннис федерациясының қағыйдаларына муўапық алып барылып, спортшылардың жас өзгешелигине қарай жеке басқышта өткериледи.
Жеңимпазларды сыйлықлаў мәресими 20-март күни болып өтеди.
Т.СЕЙТНАЗАРОВА,
Қарақалпақстан хабар агентлигиниң шолыўшысы