Усы жыл 17-март күни пайтахтымыздағы 1-санлы балалар ҳәм жас өспиримлер спорт мектебинде Өзбекстан кәсиплик аўқамлары Федерациясы Қарақалпақстан кәсиплик аўқамлары шөлкемлери бирлеспеси Кеңесиниң басламасы менен «Ҳаяллар спартакиадасы» спорт түрлери бойынша жарысларының Қарақалпақстан Республикасы басқышы өткерилди.
Спартакиаданың ашылыў салтанатында Өзбекстан кәсиплик аўқамлары Федерациясы Қарақалпақстан кәсиплик аўқамлары шөлкемлери бирлеспеси Кеңесиниң баслығы У.Жалменов ҳәм Өзбекстан кәсиплик аўқамлары Федерациясының денетәрбия ҳәм спорт саламатландырыў басқармасының баслығы Б.Таджиевлар шығып сөйлеп, жарыс қатнасыўшыларына әўмет тиледи ҳәм денетәрбия ҳәм спорт тараўына өзлериниң салмақлы үлеслерин қосқан ветеранларға «Ўзбекистон спорт фахрийси» медалы ҳәм басқа да естелик саўғаларын тапсырды.
Спартакиадаға барлық қала ҳәм районларда ҳәр түрли тараўларда жумыс ислеўши ҳаял-қызлардан қуралған сайланды 10 команда қурамында 240 ҳаял-қыз қатнасып, спорттың шахмат, шашка, жеңил атлетика, стритбол, стол тенниси, волейбол ҳәм дартс түрлери бойынша өз-ара күш сынасты.
– Министрлигимизде ҳаял-қызлар арасында саламат турмыс тәризин үгит-нәсиятлаў, денетәрбия ҳәм спорт пенен шуғылланыўды күнделикли турмыс тәризине айландырыў, олар арасында саламат турмыс тәризин қәлиплестириў мақсетинде түрли спорт илажлары өткерилип келинбекте. Бүгинги спартакиадаға сайланды командамыз бенен қатнасып атырмыз, – дейди Қарақалпақстан Республикасы Ишки ислер министрлигиниң кадрлар басқармасы бас инспекторы, майор А.Қыдырбаева. Жарыс қызғын беллесиўлерге бай болып, жарыс қатнасыўшылары өзлериниң таярлығын сынақтан өткерди.
Жарыс жуўмағында дартс спорт түри бойынша Қарақалпақстан Республикасы Ишки ислер министрлигиниң командасы, шахмат спорт түри бойынша Нөкис қаласындағы 21-санлы улыўма орта билим бериў мектебиниң оқытыўшысы Х.Жумамуратова, шашка бойынша усы мектептиң оқытыўшысы Н.Бадирова, стритбол спорт түри ҳәм стол тенниси спорт түринен билимлендириў ҳәм илим тараўының сайланды командасы, жеңил атлетика спорт түринен 100 метр аралыққа жуўырыўда Нөкис қаласындағы 21-санлы мектепке шекемги билимлендириў шөлкеминиң спорт инструкторы М.Лемзякова, 1500 метр аралыққа жуўырыўда Қарақалпақстан Республикасы Ишки ислер министрлигиниң хызметкери Ш.Далиева, жеңил атлетиканың узынлыққа секириў ҳәм теннис тобын ылақтырыў түри бойынша Қарақалпақстан Республикасы Ишки ислер министрлигиниң хызметкери С.Қудайбергенова, волейбол бойынша Қарақалпақстан Республикасы Ишки ислер министрлигиниң сайланды командасы бириншиликти ийелеп, Жиззақ ўәлаятында өткерилетуғын Өзбекстан Республикасы басқышына жоллама алды.
Жарыс жуўмағында «Ең жасы үлкен қатнасыўшы», «Ең шебер ҳәўескер спортшы», «Жеңиске қарай умтылғаны ушын» ҳәм «Ең жас қатнасыўшы» номинациялары бойынша да жеңимпазлар анықланып, оларға шөлкемлестириўшилер тәрепинен таярланған диплом ҳәм естелик саўғалары тапсырылды.
Илаж қатнасыўшыларына көркем өнер шеберлери тәрепинен таярланған концерт бағдарламасы қойып берилди.
Т.СЕЙТНАЗАРОВА,
Қарақалпақстан хабар агентлигиниң шолыўшысы
Мақаланың сүўретлери М.ҲАБИБУЛЛАЕВ тәрепинен түсирилген