Жақында пайтахтымыздағы 1-санлы балалар ҳәм жас өспиримлер спорт мектебинде Қарақалпақстан Республикасы Денетәрбия ҳәм спорт министрлиги ҳәм Өзбекстан жаўынгерлик өнери федерациясы Қарақалпақстан Республикалық бөлими тәрепинен спорттың өзбек жаўынгерлик өнери түринен республикамызда биринши мәрте Бердақ кубоги өткерилди.
Оған 2002-2011-жылларда (7-16 жастағы) туўылған жас өспиримлер ҳәм қызлар қатнасты. Кубок ойынына Сырдәрья, Қашқадәрья, Наўайы, Хорезм, Жиззақ ўәлаятларынан да спортшылар қатнасты.
Жарыс «Жеке беллесиў» ҳәм «Жеке комплекс» бағдарларында өткерилди. Ҳәр бир қатнасыўшы бириншиликти ийелеў ушын өзлериниң физикалық епшиллигин сынақтан өткерди.
Жарыс жуўмағында командалық есапта Қарақалпақстан Республикасының командасы биринши, Хорезм ўәлаятының командасы екинши, Сырдәрья ўәлаятының командасы үшинши орынды ийеледи.
Жарыс жеңимпазлары шөлкемлестириўшилер тәрепинен таярланған диплом, медаль ҳәм естелик саўғасы менен сыйлықланды.
Т.СЕЙТНАЗАРОВА,
Қарақалпақстан хабар агентлигиниң хабаршысы