Өзбекстан Республикасы Президентиниң арнаўлы қарары тийкарында буннан бир неше жыллар бурын ашылған Нөкис қаласы 1-санлы қəнигелестирилген мектеп-интернатының оқыўшылары, өзлерине жаратып берилген қолайлы имканиятлар ҳәм шараятлар нәтийжесинде бир қатар жетискенликлерге ериспекте.
Атап айтқанда, өткен оқыў жылында 33 оқыўшы миллий ҳəм халықаралык сертификатларға ийе болды. Олардың арасында, 10-класс оқыўшысы Юсупбек Дәўлетмуратов AҚШ елшиханасының FLEX (Future Leaders Exchange program) тәжирийбе алмасыў бағдарламасы жеңимпазы болып АҚШта бир жыл бийпул билим алыў ушын жолламаны қолға киргизген болса, Ислам Зинхайдаров ҳəм Малика Хожамуратовалар Ташкент қаласында болып өткен «Robo coding» таңлаўында 2-орынды жеңип алыўға миясар болды. Сондай-ақ, қәнигелестирилген билимлендириў мəкемелери агентлиги тəрепинен 2023-2024-оқыў жылында тийкарғы пəнлерден шөлкемлестирилген олимпиадаға қатнасқан мектеп оқыўшылары сыйлы 16 орынды қолға киргизди ҳәм қәнигелестрилген мектеплер арасында ең жоқары көрсеткишти ийелеўге еристи.
Усындай үлкен жетискенлерди қолға киргизип киятырған мектеп жәмәәти 1-сентябрь Өзбекстан Республикасы Ғәрезсизлигиниң 33 жыллық сәнеси ҳәм «Билимлер күни» байрамын көтериңки кейпиятта күтип алды.
Онда мектеп директоры Марат Ибрайымов, Өзбекстан Республикасы Президентиниң Қарақалпақстан Республикасындағы Халық қабыллаўханасы баслығы Салаўат Худайбергенов ҳәм басқалар шығып сөйлеп, илаж қатнасыўшыларын «Билимлер күни» байрамы менен қызғын қутлықлады ҳәм мектеп жәмәәтиниң алдағы жумысларына табыслар тиледи. -2023-2024-оқыў жылында мектебимизди 41 оқыўшы питкерген болса, сол питкериўшилеримиздиң 90 проценти жоқары оқыў орынларына кириўге миясар болды,-дейди мектеп-интернат директорының оқыў ислери бойынша орынбасары Латофат Уразалиева.-Солардан 11-класс оқыўшылары Инжайым Ўәлиева ҳәм Хушнуд Казаковлар IELTS халықаралық сертификатына ийе болып, дүнья жүзиндеги ең абырайлы American University of Beirutqa ҳәм Virginia Tech Universityне оқыўға кириўге миясар болды.
Сондай-ақ, 2024-жылдың 30-майында өткерилген Ал-Хорезмий атындағы жас математиклер халықаралық олимпиадасының 2-басқышында, 14-15 жастағы оқыўшылар арасында мектебимиздиң 8-класс оқыўшысы Малика Хожамуратова 3-орынды ийелеп, қола медалы менен сыйлықланыўға еристи.
Байрам кешесинде өткен оқыў жылы даўамында жоқары көрсеткишлерди қолға киргизген педагог ҳәм оқыўшылар “Жыл муғаллими” ҳәм “Жыл оқыўшысы” таңлаўында жеңимпаз деп табылып, оларға естелик саўғалар тапсырылды.
Кешеде жаңа оқыў жылының дәслепки қоңыраўлары қағылып, мектеп жәмәәти быйылғы оқыў жылын баслап жиберди.
Адилбай Оразов,
Қарақалпақстан хабар агентлиги