Ҳүрметли фестиваль қатнасыўшылары!
Қәдирли дослар!
Ханым ҳәм мырзалар!
Сиз, әзизлерди Халықаралық өнерментшилик фестивалының салтанатлы ашылыўы менен қызғын қутлықлап, бәршеңизге өзимниң терең ҳүрметим ҳәм жақсы тилеклеримди билдириўден оғада қуўанышлыман.
Бул конференцияда дүньяның 70 мәмлекетинен 260 тан аслам шебер өнермент ҳәм усталар, белгили илим, мәденият ҳәм көркем өнер ғайраткерлери, ғалаба хабар қураллары хызметкерлери ҳәм абырайлы халықаралық шөлкемлердиң ўәкиллери қатнасып атырғаны оған дүнья көлеминде қызығыўшылық ҳәм итибар үлкен екенинен дәрек береди.
Бизге белгили, ҳәр бир халықтың әмелий көркем өнери оның бай өтмиши ҳәм мәденияты әзелий қәдириятлары, арзыў-нийетлерин өзинде айқын сәўлелендиреди.
Дерлик үш мың жыллық тарийхқа ийе болған бизиң жанажан Ўатанымыз да ҳәм өнерментшилик тараўындағы мәңгилик дәстүрлери, шебер уста ҳәм өнерментлери менен даңққа бөленип келеди.
Әсиресе, мине усы конференцияға басшылық етип атырған гөззал Ферғана ўәлаяты, елимиздиң ески қалаларынан бири болған Хоканди латиф өзиниң бул бағдардағы бийтәкирар мийрасы, тарийхый мектеплери менен айрықша ажыралып турады.
Биз бул үлкеде гүлалшылық, жипек ҳәм абрли таўарлар ислеп шығарыў, ағаш оймакерлиги, гүлалшылық ҳәм нағыс ойыў өнери, пышақшылық, топпы тигиў сыяқлы өнер түрлери кеңнен раўажланып, миллий бренд дәрежесине көтерилгенин мақтаныш етемиз.
Дүнья өнерментшилик кеңеси қарарына бола, Қоқанд, Бухара ҳәм Марғылан сыяқлы ески қалаларымызға Өнерментшилик қаласы статусы берилгенин биз әсирлер даўамында әўладтан-әўладқа минсиз өтип киятырған мәңни дәстүр ҳәм қәдириятларымыздың жоқары тән алыўы сыпатында қабыл етемиз.
Әзиз дослар!
Кейинги жылларда елимизде халық көркем ҳәм әмелий көркем өнерин буннан былай да раўажландырыў, бул бағдарда тарийхый дәстүрлерди избе-из даўам еттирип атырған шебер усталардың машақатлы мийнетин мүнәсип қәдирлеў ҳәм қоллап-қуўатлаўға айрықша итибар берилмекте.
Бул ҳаққында сөз еткенде, қысқа мүддетте бир қатар пәрман ҳәм қарарлар қабыл етилип, бул тараў ўәкиллерине зәрүр имканиятлар ҳәм жеңилликлер жаратып берилгенин атап өтиў керек. Мине усындай ҳәрекетлеримиз себепли миллий өнерментшилик көркем өнери жедел раўажланбақта. Буны кейинги жети жылда «Өнермент» аўқамының ағзалары 7 еседен аслам көбейип, 10 мыңнан 80 мыңға шамаласқаны, тараўда бәнт болғанлар болса 280 мыңды қурап атырғаны айқын көрсетип тур.
Тараўдың раўажланыўына мүнәсип үлес қосып киятырған, қәбилетли шәкиртлер тәрбиялап, өзиниң дөретиўшилик мектеплерин жаратқан қолы гүл усталарымыздың абырайлы мийнети мәмлекетимиз ҳәм жәмийетимиз тәрепинен мүнәсип тән алынбақта. Жүзлеген уста ҳәм өнерментлеримиз Ўатанымыздың жоқары сыйлықлары – ҳүрметли атақлар, орден ҳәм медальлар менен сыйлықланбақта.
Өнерментшилик халқымыздың күнделикли турмысынан барған сайын беккем орын ийелемекте. Мәмлекетимизде усы бағдарда жүзден аслам фестиваль ҳәм ярмаркалар, саўда көргизбелери ҳәм басқа да илажлар турақлы өткерилип келинбекте.
Елимизде екинши рет өткерилип атырған Халықаралық өнерментшилик фестивалына үнлес ҳалда Риштан районында Халықаралық гүлалшылық форумы болып өтип атырғаны да бийкарға емес. Неге дегенде, Риштан тек ғана мәмлекетимиз емес, ал пүткил Орайлық Азияда гүлалшылық орайы сыпатында белгили болып есапланады.
Әлбетте, мине усындай конференциялар халықтың әмелий көркем өнерине байланыслы ески мийрасымызды қәстерлеп сақлаў, оны дүнья жүзи көлеминде кеңнен үгит-нәсиятлаў, жасларымызды уллы кәсип өнерлерге ҳүрмет ҳәм меҳир руўхында тәрбиялаўда шексиз әҳмийетке ийе болып есапланады.
Усы мәнисте, бүгин ашылып атырған бул фестиваль көркем өнер ҳәм дослық, қәбилет ҳәм шеберлик байрамы сыпатында барлық қатнасыўшылар ҳәм халқымыздың кеўлинде жарқын из қалдырады, деп исенемен.
Сиз, ҳүрметли фестиваль қатнасыўшыларына беккем денсаўлық, кеңпейил жумысыңызда жетискенликлер ҳәм әўметлер, конференция шеңбериндеги илимий-әмелий конференцияның жумысына болса табыслар тилеймен.
Хош келдиңиз, әййемги ҳәм бийтәкирар Өзбекстанға, хош келдиңиз, гөззал Қоқанд қаласына
Шавкат МИРЗИЁЕВ,
Өзбекстан Республикасы Президенти