Спорттың гандбол түри бойынша 2003-2004-жыллары ҳәм 2005-2006-жыллары туўылған жас өспиримлер ҳәм қызлар арасында Қарақалпақстан Республикалық чемпионаты өткерилиўи режелестирилмекте.
Чемпионаттың биринши тур ойынлары 4-6-май күнлери пайтахтымыздағы ойын түрлери ҳәм жеңил атлетика бойынша қәнигелестирилген балалар ҳәм жас өспиримлер спорт мектебинде, екинши тур ойынлары 29-31-май күнлери Шымбай районында, үшинши тур ойынлар Мойнақ районында, төртинши финал ойынлары усы жыл 28-29-июль күнлери пайтахтымыздағы ойын түрлери ҳәм жеңил атлетика бойынша қәнигелестирилген балалар ҳәм жас өспиримлер спорт мектебинде өткериледи.
Жарыс халықаралық гандбол федерациясы қағыйдаларына муўапық алып барылады. Жарыс айланба, жекпе-жек, қорғаныў тактикасы усыллары пайдаланылады.
Жарыс жеңимпазлары Қарақалпақстан Республикасы Дене тәрбия ҳәм спорт министрлиги ҳәм Өзбекстан гандбол федерациясы Қарақалпақстан бөлими тәрепинен таярланған диплом ҳәм естелик саўғалары менен сыйлықланады.
Қарақалпақстан хабар агентлиги