Бердақ атындағы Қарақалпақ мәмлекетлик университетиниң киши футбол майданында Өзбекстан Республикасы мәмлекетлик қәўипсизлик хызмети баслығы кубогиниң киши футбол бойынша жарысларының Қарақалпақстан Республикалық басқышы өткерилди.
Саламат турмыс тәризин үгит-нәсиятлаў ҳәм усы спорт түриниң еле де раўажланыўын тәмийинлеўге қаратылған бул жарыстың мәҳәллелердеги басқышларына усы жыл 10-апрель күни старт берилген еди. Жарыстың мәҳәллелердеги, қала ҳәм районлардағы басқышлары, 452 мәҳәлледеги 16 жастан 30 жасқа шекемги төрт мыңға шамалас (544 ти қызлар) жаслардың бас қосыўына себепши болды.
Жарыстың финаллық басқышында Хожели районының «Мустақиллик» АПЖ командасы, Тахтакөпир районының «Тахтакөпир» ППЖ командалары өз-ара күш сынасты.
Кескин беллесиўлерге бай болған бул жарыста Хожели районының «Мустақиллик» АПЖ командасы қарсыласын 2:0 есабында жеңип, бириншиликти қолға киргизди ҳәм МҚХ кубогиниң Өзбекстан Республикалық басқышына жоллама алды.
Үшинши орын ушын болған ойында Нөкис районының «Ақмаңғыт» ППЖ, Қоңырат районының «Санаат мәҳәллеси» МПЖ командалары ушырасты. Бул басқышта Нөкис районының «Ақмаңғыт» ППЖ командасы қарсыласын 2:0 есабында жеңип, үшинши орынды қолға киргизди.
Ал, киши футболдың қызлар арасында өткерилген ойынларда Әмиўдәрья районының «Қалимбек» АПЖ командасы биринши, Кегейли районының «Жалпақ жап» АПЖ командасы екинши, Шоманай районының «Ақ жап» АПЖ командасы үшинши орынды ийеледи.
Ә.Жийемуратов,
Қарақалпақстан хабар агентлиги.
М.Ҳабибуллаевтың түсирген сүўретлери