Усы жылдың 5-6-июль күнлери Ташкент ўәлаяты Шыршық олимпия ҳәм паралимпия спорт түрлерине таярлаў орайында өткерилген парақылышласыў бойынша Өзбекстан чемпионатында қарақалпақстанлы спортшылар биринши орынды ийеледи.
Президентимиздиң «Паралимпия ҳәрекетин раўажландырыўға байланыслы қосымша илажлар ҳаққында»ғы қарарын орынлаў, парақылышласыў бойынша сайланды команданы шөлкемлестириў, параспортшыларды Азия чемпионаты ҳәм Паралимпия ойынларына алып шығыў мақсетинде өткерилген чемпионат қызғын беллесиўлерге бай болды.
Жуўмақлаўшы нәтийжелерге бола, жеке беллесиўлерде 1 алтын, 1 гүмис ҳәм 2 қола, жәми төрт медальды қолға киргизген Қарақалпақстан Республикасы командасы улыўма командалық есапта мәмлекетимиздиң ең күшли парақылышпазлары деп табылды. Мәмлекетимиздиң барлық ўәлаятларынан қатнасқан беллесиўлерде күшли үшликтен Ташкент ҳәм Наманган ўәлаяты командалары орын алды.
Қарақалпақстан хабар агентлиги