28-июнь күни Өзбекстан Республикасы Президенти Шавкат Мирзиёев ҳәм Түркия Республикасы Президенти Режеп Таййип Эрдоғанның телефон арқалы сөйлесиўи болып өтти.
Мәмлекет басшылары бир-бирин ҳәм туўысқан халықларымызды мүбәрек Қурбан ҳайыт пенен қызғын қутлықлап, тынышлық-парахатшылық, абаданлық тилеклерин билдирди.
Көп қырлы бирге ислесиўди буннан былай да кеңейтиў ҳәм кең көлемли стратегиялық шериклик қатнасықларын беккемлеўдиң әҳмийетли мәселелери көрип шығылды.
Жоқары дәрежедеги келисимлерге муўапық сиясий, саўда-экономикалық, инвестициялық ҳәм мәдений-гуманитарлық тараўлардағы әмелий бирге ислесиў жоқары пәт ҳәм нәтийжели түске енгени атап өтилди.
Елимизде Түркияның жетекши компанияларының қатнасыўында ири инвестициялық жойбарлар жедел әмелге асырылмақта. Жылдың басынан берли дерлик 100 жаңа қоспа кәрхана дүзилди.
Усы жылдың 1-июль күнинен баслап Жеңиллетилген саўда ҳаққындағы ҳүкиметлераралық келисимниң күшке кириўи өз-ара саўда көлеминиң және де артыўына хызмет етеди. Еки мәмлекет қалалары арасында авиақатнаўлар көбеймекте.
Сөйлесиў ўақтында халықаралық ҳәм регионаллық күн тәртибиндеги әҳмийетли мәселелер бойынша да пикир алысылды.
Болажақ жоқары дәрежедеги илажлардың режеси көрип шығылды. Өзбекстан – Түркия жоқары дәрежедеги Стратегиялық бирге ислесиў кеңесиниң гезектеги мәжилиси күн тәртибин пуқта таярлаў әҳмийетли екени айрықша атап өтилди.
ӨзА