Ташкент ҳәм Бишкек қалаларында CAFA NATIONS CUP-2023 жарысының 1-тур ойынлары болып өтти.
«А» топарында болып өткен ойында Өзбекстан сайланды командасы Оман футболшылары менен ушырасты.
Ушырасыўдың 7-минутында Жалалатдин Машарипов жәрийма тобын шеберлик пенен теўип өз командасын алдынға алып шыққан болса, 24-минутта Машарипов дублге еристи.
Екинши таймда болса, Ҳожиакбар Алижанов өзи баслаған ҳүжимди гол менен жуўмақлап, Өзбекстан сайланды командасына турнирдеги дәслепки жеңисти алып келди.
Усы топарда өткерилген екинши ойында болса, Тәжикстан сайланды командасы Түркменстан сайланды командасы менен ушырасып, 1 упайдан өз-ара бөлисип алды.
«B» топарында өткерилген ойында болса, Қырғызстан сайланды командасы аўғанстанлы футболшылар менен ушырасты ҳәм ойынға қосып берилген ең соңғы минутта гол урып, топар жетекшисине айланды. Есап 1:0 Қырғызстан пайдасына.
А.Оразов,
Қарақалпақстан хабар агентлиги жетекши шолыўшысы