Астана қаласында самбо бойынша Азия ҳәм Океания чемпионатына старт берилди.
Жарыстың дәслепки күнинде көзи әззи ҳәм ветеран спортшылар арасында беллесиўлер өткерилди. Онда Өзбекстан сайланды командасы ағзалары 19 медалды қолға киргизиўге миясар болды.
Қуўанышлы тәрепи сонда, ветеран спортшылар арасында 50-54 жастағы палўанлар беллесиўинде +98 кг да Дәўлетмурат Қалхоразов қола, 55-59 жастағылар арасында -79 кг да Азамат Юсупов гүмис, 60-64 жастағылар арасында -79 кг да Сансызбай Юсупов қола, -88 кг да Жумабек Нурымбетов гүмис, -98 кг да Махсетбай Алланов қола, +65 жастан жоқары спортшылар арасында -71 кг да Қудайберген Наўрызбаевлар қола медалын жеңип алыўға миясар болды.
Өзлериниң усындай жетискенликлери менен жасларымызға өрнек болып жүрген бул ветеран спортшыларды шын кеўилден қутлықлаймыз.
А.Оразов,
Қарақалпақстан хабар агентлиги жетекши шолыўшысы