Нөкис гарнизонындағы әскерий бөлимде азаматлық ўазйпасын атқарып атырған мүддетли әскерий хызметкерлерге әскерий бөлим басшылығының оқыўға кириўде жеңиллик бериўши усыныс хатын алыў ушын тест сынақлары болып өтти.
Жасларда әскерий хызметке ҳәм әскерий кәсипке қызықтырыў, оларды хошаметлеў, әскерий хызметтиң абырайын арттырыў мақсетинде Өзбекстан Республиасы Қураллы Күшлериниң қатарында мүддетли әскерий хызметти өтеў дәўиринде жаўынгерлик ҳәм руўхый-ағартыўшылық таярлықлар бойынша жоқары нәтийжелерге ерискен, зәрүр билим дәрежесине ийе, үлгили әскерий тәртипти көрсеткен жигитлер Өзбестан Республикасы жоқары билимлендириў, илим ҳәм инновациялар министрлиги жанындағы Билим ҳәм қәнигеликти баҳалаў агентлиги тест сынақларында қатнасты. Олардан жоқары балл топлаған ең мүнәсиплери әскерий бөлим басшылығы тәрепинен жоқары оқыў орынларына оқыўға кириўде қосымша жеңилликке ийе усыныс хаты берилиўи белгиленген.
Усыныс хатқа ийе болған әскерлер мәмлекетимиздиң жоқары әскерий билимлендириў мәкемелериндеги тийисли билимлендириў бағдарына оқыўға кириўде тест сынақларының нәтийжелерине бола топлаған балларының 50 проценти муғдарында қосымша балл түриндеги жеңилликке, жоқары оқыў орынларының бакалавриатына оқыўға кириўи ушын тийисли оқыў жылына тастыйықланатуғын жоқары билимлендириў мәкемелерине қабыллаў параметрлеринен тысқары өз алдына ажыратылған қабыллаў көрсеткишлери шеңберинде таңлаўда қатнасыў ҳуқықына ийе болады.
Округ әскерлери сәркардалығы тәрепинен бул тест сынақларында әдиллик принциплерине тийкарланған ҳалда ашық-айдынлықты тәмийинлеў мақсетинде шөлкемлестирилген 12 аудиторияның барлығында бақлаў камералары орнатылған болып, олар арқалы реал ўақыт нормасы формасында көрсетилетуғын видеокөринислердиң барлығы системаға жазып сақланады.
Еслетип өтемиз, Қорғаныў министрлиги әскерий бөлимлеринде жоқары билимлендириў мәкемелерине оқыўға кириўде жеңиллик бериўши усыныс хатлар ушын тест сынақлары 26-31 январь күнлери болып өтеди.
Қарақалпақстан хабар агентлиги