Өзбекстан Кураш федерациясы Қарақалпақстан Республикасы бөлиминде өткен жылдың жуўмағы бойынша жақсы нәтийжелерге ерискен спортшыларды, олардың тренерлери, кураш миллий спорт түрин раўажландырыўға, оны үгит-нәсиятлаўға мүнәсип үлес қосқанларды хошаметлеў мақсетинде “Ардақлаў-2022” сыйлықлаў мәресими болып өтти.
Қарақалпақстан Республикасы прокуратурасы, Спорт министрлиги менен биргеликте шөлкемлестирилген илажда атап өтилгениндей, Өзбекстан Республикасы Президентиниӊ 2020-жыл 4-ноябрьдеги “Кураш миллий спорт түрин раўажландырыў ҳәм оныӊ халықаралық абырайын буннан былай да арттырыў илажлары ҳаққында”ғы қарарыныӊ орынланыўын тәмийинлеў мақсетинде кең көлемли жумыслар әмелге асырылмақта. Қарар тийкарында бир қатар жарыслар өткерилип келинбекте. Ҳәр жылдың жуўмағында жақсы нәтийжелерге ерискен спортшыларды, олардың тренерлерин, кураш миллий спорт түрин раўажландырыўға, оны үгит-нәсиятлаўға мүнәсип үлес қосқанларды хошаметлеп барыў дәстүрге айланбақта.
Илажда “Жылдың ең жақсы тренери”, “Жылдың ең жақсы спортшысы”, “Жылдың ең жақсы қыз спортшысы”, “Жылдың ең жақсы жас спортшысы”, “Жылдың ең жақсы жас қыз спортшысы”, “Жылдың ең жақсы төрешиси”, “Жылдың ең жақсы ҳаял төрешиси”, “Жылдың ең жақсы спорт директоры”, “Жылдың ең жақсы журналисти”, “Кураш спортын раўажландырыўда салмақлы үлесин қосқаны ушын”, “Өзбекстан Бас Прокуроры кубогинде ең жақсы нәтийже көрсеткени ушын”, “2022-жылы жәҳән чемпионатында төрешилик еткени ушын” сыяқлы жәми 16 номинация бойынша жеңимпазлар анықланды.
–“2022-жылы жәҳән чемпионатында төрешилик еткени ушын” номинациясына мүнәсип тапқанынан миннетдарман,–дейди халықаралық дәрежедеги төреши Нөкисбай Данияров.–Өткен жылы сентябрь айында кураш бойынша Тайланд мәмлекетинде болып өткен Азия чемпионатында, декабрь айында Индия мәмлекетинде болып өткен жәҳән чемпионатында төрешилик еттим. Бундай илажлардың өткерилиўи миллий спортымызды халқымыз, соның ишинде, жасларымыз арасында кеңнен үгит нәсиятлаўда айрықша әҳмийетке ийе.
Жеңимпазлар Өзбекстан Кураш федерациясы Қарақалпақстан Республикасы бөлими тәрепинен диплом, статуэтка ҳәм естелик саўғалары менен сыйлықланды.
Д.АБИБУЛЛАЕВ,
Қарақалпақстан хабар агентлигиниң шолыўшысы
М.ҲӘБИЙБУЛЛАЕВ тың түсирген сүўретлери