Исбилерменлер ҳәрекети – Өзбекстан Либерал-демократиялық партиясы Қарақалпақстан Республикалық Кеңеси тәрепинен Бердақ атындағы Қарақалпақ мәмлекетлик университетинде мини-футбол ҳәм стол тенниси бойынша жарыс өткерилди.
Еки күн даўам еткен спорт жарысында спорттың мини-футбол түри бойынша биринши орынды архитектура, екинши орынды биология ҳәм үшинши орынды экономика факультетлери жеңип алды. Ҳаял-қызлар арасында өткерилген стол тенниси бойынша биринши орынды биология факультети студенти Ю.Қудайбергенова, екинши орынды шет тиллер факультетиниң студенти М.Көмекова, үшинши орынды тарийх факультетиниң студенти Ф.Мадреймова жеңип алды.
– Университетимиздиң барлық факультетлеринен, солардың қатарында бизиң факультетимиздиң 1-курс студентлери спорттың мини-футбол ҳәм стол тенниси түрлери бойынша жарысқа қатнасты, -дейди университеттиң юридика факультети деканының Жаслар менен ислесиў бойынша орынбасары Баўыржан Ермекбаев. – Студентлеримиз кеўилли кейпиятта ҳәм жоқары таярлықта келди. Себеби, 9-ноябрь күни факультетимиздиң 4 курсы арасында мини-футбол бойынша бириншилик өткерилген еди. Онда 405-топар студентлери 67 топардың ишинде биринши орынды алды. Сол жарыста жақсы ойнағанларының арасынан таңлап алынған 1-курс студентлери бүгинги беллесиўге қатнасты.
Мини-футбол беллесиўлерине университеттиң ҳәр бир факультетинен 10 студенттен жәми 160 ул бала, ал, стол теннисинен жәми 32 қыз қатнасты. Жарыс шөлкемлестирилиўинен алдын спорттың усы түрлери менен шуғылланатуғын жасларды таңлап алыў мақсетинде дағаза берилген еди. Мини-футбол беллесиўлеринде ҳәр командада 5 адамнан ойнады. Ҳәр матч 10-12 минуттан жуўмақланды.
– Бизлер жарысқа қатнасып, көп дослар арттырдық. Барлық командалар күшли таярлық пенен келген екен. Архитектура факультети студентлериниң де күшли қарсылас бола алатуғынын көрсете алдық, деп ойлайман, -дейди университеттиң Архитектура факультети Қала қурылысы қәнигелиги студенти Азамат Алламбергенов.-Беллесиўге басқа факультетлердиң студентлери менен қарым-қатнасықты күшейтиў, тәжирийбе арттырыў, устазларымызға билимимизди, шаққанлығымызды көрсетиў мақсетинде қатнастық.
Қарақалпақстан хабар агентлиги