Бозатаў районындағы амфитеатрда «Бозатаў талантлыларды жүзеге шығарады» сүрени астында өткерилген «Жаслар ҳаўазы» таңлаўы республикалық басқышының жеңимпазларын сыйлықлаў мәресими ҳәм гала концерти болып өтти.
Илаж қатнасыўшылары районда салтанатлы күтип алынып, Бердақ атындағы Жаслар бағындағы уллы ойшыл шайырдың естелигине гүл шеңберин қойды. Усы күни пуқаралар жыйынлары жаслары арасында волейбол бойынша район ҳәкиминиң кубоги ушын, кураш бойынша район прокурорының кубоги ушын, баскетбол бойынша районлық ишки ислер бөлими баслығының кубоги ушын спорт жарыслары, районлық салық инспекциясы баслығының кубоги ушын «Зәкаўат» интеллектуаллық ойыны, қарақалпақ миллий тағамлары фестивалы, өнерментлердиң көргизбеси болып өтти. Миллий тағамлар фестивалы шеңберинде өткерилген аспазлар таңлаўында Қарақалпақ улыўма аўқатланыў кәрханалары бирлеспесине қараслы Төрткүл районы аспазлық өнери бирлеспесиниң баслығы Дилобар Ҳабибуллаева сыйлы биринши орынды ийелеп, Қарақалпақстан Республикасы Министрлер Кеңесиниң дипломы ҳәм естелик саўғасы менен сыйлықланды.
«Жаслар ҳаўазы» таңлаўы республикалық басқышының жеңимпазларын сыйлықлаў мәресиминде Қарақалпақстан Республикасы Жоқарғы Кеңесиниң Баслығы М.Камалов шығып сөйлеп, елимизде жас талант ийелерин қоллап-қуўатлаўға қаратып атырған итибары ушын Президентимизге миннетдаршылық билдирди ҳәм таңлаў жеңимпазларын қутлықлады.
Өзбекстан Жаслар ислери агентлиги тәрепинен бир қатар шөлкемлер менен биргеликте өткерилген таңлаўдың республикалық басқышында аймақлық басқышларда жеңимпаз болған ең талантлы 152 жас қатнасты. Олар үш күн даўамында 10-15, 16-22, 23-30 жас категорияларында бақсышылық, дәстүрий атқарыўшылық, опера ҳәм эстрада бағдарларында өз өнерлерин көрсетти. Төрешилер қурамы тәрепинен ең мүнәсиплер жеңимпаз деп табылды.
Атап айтқанда, бақсышылық бағдары бойынша 10-15 жастағылар арасында биринши орынды Қарақалпақстан Республикасынан Әширбек Қозыбаев, екинши орынды Қашқадәрья ўәлаятынан Жамшид Шоқулов, үшинши орынды Сурхандәрья ўәлаятынан Донияр Тошмурадов, 16-22 жастағылар арасында биринши орынды Қарақалпақстан Республикасынан Гүлайым Өтешова, екинши орынды Қашқадәрья ўәлаятынан Оғабек Улашов, үшинши орынды Ташкент қаласынан Элдор Шомуратов, 23-30 жастағылар арасында биринши орынды Ташкент ўәлаятынан Муратжан Алиев, екинши орынды Сурхандәрья ўәлаятынан Фаррух Нуралиев, үшинши орынды Қарақалпақстан Республикасынан Азамат Елмуратов, опера бағдары бойынша 10-15 жастағылар арасында биринши орынды Ташкент қаласынан Лазизбек Шоназаров, екинши орынды Қарақалпақстан Республикасынан Бахытбек Қалыбаев, үшинши орынды Наўайы ўәлаятынан Нодира Толибжанова, 16-22 жастағылар арасында биринши орынды Ташкент ўәлаятынан Зухра Турсынбаева, екинши орынды Қашқадәрья ўәлаятынан Озоджон Мурадов, үшинши орынды Самарқанд ўәлаятынан Малика Акмалжанова, 23-30 жастағылар арасында биринши орынды Сурхандәрья ўәлаятынан Камал Мухаммадиев, екинши орынды Қашқадәрья ўәлаятынан Хожаназар Жумаев, үшинши орынды Ташкент қаласынан Хислат Камилов ийеледи.
Эстрада бағдары бойынша 10-15 жастағылар арасында биринши орынды Қарақалпақстан Республикасынан Зарима Махсудова, екинши орынды Ташкент қаласынан Марьям Черкашина, үшинши орынды Сырдәрья ўәлаятынан Лайло Шарафиддинова, 16-22 жастағылар арасында биринши орынды Жиззак ўәлаятынан Ҳожиакбар Тәжибаев, екинши орынды Наманган ўәлаятынан Ноила Ҳабибуллаева, үшинши орынды Ташкент қаласынан Умида Фаррухова, 23-30 жастағылар арасында биринши орынды Қарақалпақстан Республикасынан Алымбай Каримбаев, екинши орынды Наманган ўәлаятынан Камрон Мамадалиев, үшинши орынды Ташкент ўәлаятынан Мунисбек Реджепов, дәстүрий атқарыўшылық бағдары бойынша 10-15 жастағылар арасында биринши орынды Ташкент қаласынан Шербек Шавкатов, екинши орынды Ташкент ўәлаятынан Азадбек Абдуматалибов, үшинши орынды Хорезм ўәлаятынан Асадбек Рахимов, 16-22 жастағылар арасында биринши орынды Ташкент қаласынан Севинч Жовлиева, екинши орынды Сурхандәрья ўәлаятынан Асқар Темиров, үшинши орынды Бухара ўәлаятынан Гүлшырай Бахшиллаева, 23-30 жастағылар арасында биринши орынды Ташкент қаласынан Хушниджон Солижанов, екинши орынды Сырдәрья ўәлаятынан Бабақул Арзиев, үшинши орынды Ташкент ўәлаятынан Азаматжан Йулдашев қолға киргизди.
Барлық бағдарлар бойынша биринши орын ийелерине 50 миллион сум, екинши орынларға 30 миллион сум, үшинши орынларға 20 миллион сум пул сыйлығының сертификатлары тапсырылды. Буннан тысқары, қатнасыўшылардың барлығы 10 миллион сум менен сыйлықланды.
Көркем өнер шеберлериниң, белгили эстрада қосықшылардың ҳәм жас атқарыўшылардың концерт бағдарламасы, салютлар шоусы қатнасыўшылар менен мийманларда айрықша тәсир қалдырды.
Фестивальдың жуўмақлаўшы гала концерти ҳәм жеңимпазларды сыйлықлаў мәресимине Қарақалпақстан Республикасы Министрлер Кеңесиниң Баслығы Қ.Сариев, Өзбекстан Жаслар ислери агентлиги директоры А.Саъдуллаев қатнасты.
Д.АБИБУЛЛАЕВ,
Қарақалпақстан хабар агентлигиниң шолыўшысы