Японияда коронавируснинг омикрон штаммига учраган бемор вафот этди. Бу айни сабаб туфайли мамлакатда юз берган илк шундай воқеа. Бу ҳақда Киодо агентлиги хабар тарқатган.
Бу ерда гап Сидзуока шаҳрининг ёши улуғ бир фуқароси ҳақида кетяпти. Таҳлиллар унда коронавируснинг «омикрон» штамми борлигини тасдиқлади.
Умуман, сўнгги кунларда Японида ушбу хасталик билан касалланишнинг 1 сентябрдан бу ёғига энг юқори кўрсаткичлари, аниқроғи кунига 22 мингдан ортиқ ҳолат қайд қилиняпти. Охирги статистикада бир кунда 11 нафар бемор ҳаётдан кўз юмгани келтирилган. Ҳафта бошида эълон қилинган хабарда кун чиқар юртнинг 47 префектурасида «омикрон» штамми аниқлангани айтилганди.
Эпидемия даври бошлангандан буён Японияда суткалик энг юқори ўсиш даражаси – 25 992 ҳолат ўтган йилнинг 20 августига тегишли.
Бинобарин, «РИА Новости» Пекин юқумли касалликларни назорат ва профилактика қилиш маркази маълумотига таяниб хабар беришича, айни дам бу улкан шаҳарда ҳам коронавируснинг омикрон штамми билан зарарланган илк фуқаро рўйхатга олинди.
Ушбу бемор Хитой пойтахти шимоли-ғарбида истиқомат қилади. Ахборотда у киши охирги икки ҳафта давомида хорижга чиқмагани ва бошқа провинцияларда ҳам бўлмагани қўшимча қилинган.