Коррупция – тараққиёт кушандаси. Шу боис бутун дунёда унга қарши курашилади. Мамлакатимизда ҳам коррупцияга қарши курашишнинг яхлит тизими яратилган. Бу борада Ўзбекистон Республикасининг “Коррупцияга қарши курашиш тўғрисида”ги қонуни муҳим аҳамият касб этади. Мазкур қонунда фуқаролар ҳуқуқлари, эркинликлари, қонуний манфаатларининг устуворлиги, очиқлик ва шаффофлик тамойиллари, давлат ҳамда фуқаролик жамияти ҳамкорлиги, коррупциянинг олдини олишга доир чора-тадбирлар устуворлиги, жавобгарликнинг муқаррарлиги каби принципларга алоҳида эътибор қаратилган. Коррупцияга қарши курашиш бўйича давлат дастури ишлаб чиқилди. Унда белгиланган чора-тадбирларни амалга ошириш учун Коррупцияга қарши курашиш бўйича республика идоралараро комиссияси ташкил этилди.

Ўтган қисқа фурсат ичида мазкур комиссия томонидан қатор самарали чора-тадбирлар амалга оширилди. Таълим, соғлиқни сақлаш муассасаларида, маҳаллаларда тарғибот тадбирлари ўтказилмоқда, коррупцияга қарши кураш акс этган видеороликлар ҳавола этилмоқда, тарқатма материаллар аҳолининг кенг қатламига етказиб берилмоқда. Коррупцияга қарши курашиш бўйича давлат дастури доирасида 5 мингдан ортиқ давра суҳбати ўтказилди. ЕХҲТ, БМТ каби халқаро нуфузли ташкилотлар билан ҳамкорликда қатор лойиҳалар амалга оширилмоқда.

Халқаро пресс-клуб сессиясида журналистлар тиббиёт, таълим соҳаси, коммунал тўловлар тизимида ноқонуний хатти-ҳаракатларга қарши олиб борилаётган чора-тадбирлар билан қизиқди.

Коррупциянинг олдини олиш мақсадида таълим тизимига замонавий ахборот-коммуникация технологияларини жорий этиш яхши самара бермоқда. 2017/2018 ўқув йилида илк бор олий таълим муассасаларига кириш имтиҳонлари онлайн режимда ўтказилди. Бу жараён келгусида янада такомиллашмоқда. Давлатимиз раҳбарининг жорий йил 16 ноябрдаги “Республика олий таълим муассасалари бакалавриатига кириш тест синовларини ўтказиш тартибини такомиллаштириш тўғрисида”ги қарорига асосан 2018/2019 ўқув йилидан бошлаб олий таълим муассасаларига қабул қилиш бўйича кириш тест синовлари 1 августдан 15 августгача бўлган даврда ўтказилади. Натижалар тест ўтказилган куннинг эртасига Давлат тест марказининг расмий веб-сайтида эълон қилинади. Бу тизимда ноқонуний ҳаракатларнинг олдини олишга хизмат қилади.

Тиббиёт муассасаларида, хусусан, туғруқхоналарда таъмагирликнинг олдини олиш мақсадида «ишонч телефонлари» хизмати йўлга қўйилган. Табиий газ ва электр энергияси учун тўловларнинг энг қулай, ишончли тизими яратилди.

Тадбир доирасида мактаб, академик лицей ва коллеж ўқувчилари, олий таълим муассасалари талабалари ўртасида “Ўзбекистон ёшлари коррупцияга қарши” шиори остида ўтказилган расмлар ва иншолар кўрик-танлови ғолиблари тақдирланди.