Холиқзода Абдуманон Ғаффор: “Ўзбекистондаги давлат хизматлари марказлари фаолияти ўрганса арзигулик тажриба”

Ўзбекистон Республикаси Адлия вазирлиги таклифига биноан мамлакатимизда келган Тожикистон Республикаси адлия вазирининг биринчи ўринбосари Холиқзода Абдуманон Ғаффор бошчилигидаги делегация 28 ноябрь куни Бухорода бўлди.

Меҳмонларнинг ташрифи Давлат хизматлари агентлигининг Бухоро шаҳар марказидан бошланди. Марказ кўплаб қулайликларга эга. Масалан, унинг зали бўйлаб ўрнатилган белгилар, хизматларни онлайн тарзида олиш имконини берадиган инфокиосклар, у ёки бу давлат хизматидан фойдаланиш жараёни ҳақида электрон навбат талонини олиш юзасидан малакали мутахассислар томонидан кенг маълумотлар берилиши, монитор орқали электрон навбат рўйхати намойиш этилиши мижозларга қулайлик яратади.
Бугунги кунда марказ томонидан юридик шахслар ва фуқароларга жами 100 дан зиёд давлат хизматлари кўрсатилмоқда. Автомототранспорт воситаларини давлат рўйхатидан ўтказиш, эски ҳайдовчилик гувоҳномасини янги намунадагисига алмаштириш, биометрик паспорт олиш, болаларни мактабгача таълим муассасаларига жойлаштиришга йўлланма ва автомобиль рақамларини бериш кабилар шулар жумласидандир. Замонавий ахборот -коммуникация технологиялари жорий этилгани мазкур хизматларнинг сифатли ва тезкорлигини таъминламоқда.

4.jpg

8.jpg
– Ўзбекистон ва Тожикистон Президентларининг бевосита раҳнамолигида мамлакатларимиз ўртасидаги кўп томонлама алоқалар ҳаётимизнинг барча жабҳаларини қамраб олмоқда, – дейди Тожикистон Республикаси адлия вазирининг биринчи ўринбосари Холиқзода Абдуманон Ғаффор. – Вазирликларимиз ўртасидаги ҳамкорлик ҳам мустаҳкамланиб бораётир. Бу эса ислоҳотлар самарасида эришилган ютуқлар билан танишиш, илғор тажрибалардан фойдаланишда қўл келмоқда. Бухоро шаҳридаги давлат хизматлари маркази фаолияти билан танишдик. Бу ердаги қулайликлар, ишнинг оқилона ташкил этилгани бизда катта таассурот қолдирди. Марказ фуқаролар ва юридик шахслар вакилларига бир том остида тегишли хизматлар кўрсатиши улар оғирини енгил қилади, вақтини тежайди. Бу, ўрганса арзигулик тажриба.
Қўшни мамлакат делегацияси аъзолари улуғ аждодимиз, комил инсон тарбиясида муҳим аҳамиятга эга нақшбандия тариқати асосчиси Баҳоуддин Нақшбанднинг Когон туманида жойлашган ёдгорлик мажмуасида бўлиб, пир қабрини зиёрат қилди. Шунингдек, улар Бухоро шаҳридаги кўп асрлик тарихга эга меъморий обидалар билан ҳам танишди.

 

Эркин Ёдгоров, Тоҳир Истатов (сурат), ЎзА