Ўзбекистон Республикаси Президентининг Франция Республикасига расмий ташрифи арафасида турли тадбирлар бўлиб ўтмоқда. Мазкур тадбирларда иштирок этаётган Ўзбекистон Республикаси Олий Мажлиси Сенати раисининг биринчи ўринбосари С.Сафоев ЎзА мухбирига интервью берди.

– Давлатимиз раҳбари Европа мамлакатлари орасида биринчи бўлиб Францияга ташриф буюрмоқда. Ушбу тарихий аҳамиятга молик воқеага Парижда катта тайёргарлик кўрилмоқда.

Албатта, Ўзбекистон Президентининг Францияга ташрифидан кўзланган асосий мақсад икки томонлама алоқаларни янги босқичга кўтаришдан иборатдир. Ташриф дастури турли учрашув ва музокараларга бой бўлиб, бу мулоқотлар ўзаро манфаатли барча соҳаларда шерикликни янги поғонага кўтаришга хизмат қилади.

Франция – “Катта еттилик” аъзоси. Унинг иқтисодий қудрати ҳақида тасаввур ҳосил қилиш учун шу сўзларнинг ўзи кифоя. Таъкидлаш мумкин бўлган яна бир далил шуки, Франция – БМТ Хавфсизлик кенгашининг доимий аъзоларидан бири. Глобал масалалар унинг унинг иштирокисиз ҳал этилмайди. Шундай давлат билан ҳамкорликни кенгайтириш нафақат Ўзбекистон, балки бутун Марказий Осиё мамлакатлари манфаатларига хизмат қилади.

Президентимиз ташрифи чоғида икки мамлакат ўртасида сиёсий, савдо-иқтисодий, инвестициявий, маданий-гуманитар ҳамкорлик масалалари муҳокама қилинади.