Ўзбекистон Республикаси Вазирлар Маҳкамасининг 2018 йил 7 августдаги “Ўзбекистон Республикаси Давлат божхона хизмати органларининг байроғи ва фарқлаш белгиси намуналарини, шунингдек, уларни тайёрлаш, ишлатиш, сақлаш ва йўқ қилиш тартиби тўғрисидаги низомни тасдиқлаш ҳақида”ги қарори билан Ўзбекистон Республикаси Давлат божхона хизмати органларининг байроғи ва фарқлаш белгиси тасдиқланди. Шунингдек, уларни тайёрлаш, ишлатиш, сақлаш ва йўқ қилиш тартиби тўғрисидаги Низом ҳам кучга кирди. Бу ҳақида Давлат божхона қўмитаси Ахборот хизмати маълум қилди.

Ўзбекистон Республикаси божхона хизмати органларининг байроғи тараққиёт ва барқарорликни ифода этувчи тўқ кўк рангли тўғри бурчакли мато кўринишига эга.

Байроқнинг узунлиги – 250 см., эни – 125 см. Байроқ марказида Ўзбекистон Республикаси давлат божхона органларининг фарқлаш белгиси тасвирланган.

Байроқ бошқа ўлчамларда бўлиши мумкин, аммо ҳамма ҳолларда байроқнинг эни унинг узунлигига нисбати 1/2 ташкил этиши шарт.

Ўзбекистон Республикаси давлат божхона хизмати органларининг фарқлаш белгиси мустаҳкамлик, барқарорлик, собитлик ва доимийликни ифода этувчи кумуш рангли саккиз қиррали шаклига эга бўлиб, унинг ички қисмида саккиз бурчакдан оқ рангли халқа билан ажратилган яшил рангдаги доирасимон чизиқ билан ўралган кумуш рангли глобус тасвирланган.

Доирасимон чизиқнинг юқори қисмида оқ рангли бош ҳарфлар билан лотин алифбосида «O‘ZBEKISTON RESPUBLIKASI», пастки қисмида «DAVLAT BOJXONA XIZMATI» деб ёзилган. Ёзувлар саккиз қиррали иккита юлдуз билан ажратилган.

Глобус ва Ўзбекистон Республикаси харитаси марказида тасвирланган Меркурий таёғи Ўзбекистон Республикасининг иқтисодий манфаатларини химоя қилиш ва иқтисодий ҳавфсизлигини таъминлаш ҳамда Ўзбекистон Республикасининг дунёнинг барча давлатлари билан савдо мунособатларини ривожлантириш ва мустаҳкамлашни англатади.

Таъкидлаш жоизки, божхона органларининг байроғи ва фарқлаш белгиси божхона органларининг расмий рамзларидир.

Божхона органлари байроғи ва фарқлаш белгисининг тасвири ўқув-тарбиявий жараёнда ишлатилиши, божхона органлари тизимида мукофотлар элементи сифатида фойдаланилиши, божхона органларига тегишли эканлигини белгилаб берилиши мақсадида буюмларга жойлаштирилиши мумкин.

Ўзбекистон Республикасида божхона органларининг байроғи ва фарқлаш белгисининг тасвиридан пештахта, бланка, ҳисоб рақамлари, ва бошқа ҳужжатларда, эълонлар ва рекламаларда, товарлар ва уларнинг ўрамида, шунингдек, юридик ва жисмоний шахслар томонидан тижорат фаолиятини амалга оширишда божхона органларининг номларига ўхшаш бўлган белгилардан фойдаланиш тақиқланади.

Нодавлат нотижорат ташкилотларнинг белгиси ва атрибутида божхона органларининг байроғи ва фарқлаш белгисига ўхшаш элементларнинг бўлишига йўл қўйилмайди.

Шунингдек, божхона органлари ходимлари божхона органлари байроғи ва фарқлаш белгисини ҳурмат қилишлари шартлиги ҳам ушбу ҳужжатда белгилаб қўйилди.