Тошкентда “TexVET Karyera” лойиҳаси доирасида юқори даражадаги манфаатдор томонлар учрашуви бўлиб ўтди.
Ўзбекистон бўйлаб касб-ҳунар йўналишидаги хизматларни ривожлантириш учун масъул ҳукумат вакиллари, хусусий сектор раҳбарлари ва таълим муассасалари ходимлари қатнашган мазкур йиғилишдан кўзланган мақсад хусусий сектор, жамоат ташкилотлари ва таълим тизими ҳамкорлигини ривожлантириш, тегишли хизматларнинг аҳамияти, хусусан иқтисодиётимиз учун малакали кадрлар тайёрлашдаги ролини кенг жамоатчиликка етказишдан иборат.
Тадбирда Ёшлар ишлари агентлиги, Олий таълим, фан ва инновациялар, Мактабгача ва мактаб таълими, Камбағалликни қисқартириш ва бандлик вазирликлари, Савдо-саноат палатаси, Алкоголсиз ичимлик ва шарбат ишлаб чиқарувчилар ассоциацияси, “Safia”, “Coca-Cola”, “Teamdress” каби хусусий корхоналар ва турли нодавлат ташкилотлар вакиллари ҳам иштирок этди.
GIZ – Германия ҳамкорлик ташкилотининг “TexVET Karyera” лойиҳаси раҳбари Матиас Клингенберг сўзларига кўра, касб-ҳунар йўналишидаги хизматларни қўллаб-қувватлашда вазирликлар, саноат, таълим муассасалари ва нодавлат ташкилотлар ўртасидаги барқарор ҳамкорлик муҳим аҳамиятга эга. Бунда иш берувчи ва жамоат ташкилотлари ҳам фаол иштирок этиши зарур.
Тадбирда инновацион касбий йўналиш бўйича ёндашувларнинг синовдан ўтказилиши жараёни ҳақида ҳам маълумот берилди. Бундай ёндашув нафақат ўқувчиларга амалий касбий тушунча бериш, балки маҳаллий компания ва жамоат ташкилотларини жараёнга фаол жалб қилишни ҳам назарда тутади.
Учрашувда йирик компаниялар, жамоат уюшмалари вакиллари мактаблар билан ҳамкорликни йўлга қўйиш мақсадида ўқувчиларга ўз фаолиятлари ҳақида маълумот берди. Ёшларни касб-ҳунарга қизиқтириш, уларга иш ўргатиш бўйича тажриба билан ўртоқлашди.
GIZ, USAID, UNICEF ва “Helvetas” каби халқаро ташкилотлар экспертлари муҳокама чоғида касбий йўналиш бўйича илғор тажриба билан бўлишди.
Қайд этилганидек, анжуман юртимизда касбий йўналиш ва касб-ҳунар таълимини ривожлантириш учун манфаатдор томонлар ҳамкорлигини мустаҳкамлашга хизмат қилади.
Гўзал Сатторова, ЎзА