“Turkish Airlines” авиакомпанияси жорий йилнинг 21 майидан бошлаб Истанбул ва Кобул ўртасида авиақатновни қайта йўлга қўяди, деб хабар тарқатди Афғонистоннинг “Tolo News” телеканали. Хабарда айтилишича, “Turkish Airlines” 2021 йил 14 августда Кобулга сўнгги қатновни уюштирган эди. Афғонистонда сиёсий вазият ўзгарганидан кейин компания мамлакатга парвозларини тўхтатиб қўйганди.

Авиакомпаниянинг расмийлари маълум қилишича, самолёт қатновлари ҳафтасига тўрт марта амалга оширилади. Аввалроқ “Tolo News” телеканали Афғонистонга “Flydubai” ва “Air Arabia” компаниялари ҳам авиақатновларни йўлга қўйгани ҳақида хабар тарқатган эди.