Аввал хабар қилганимиздек, Тошкентда “Ўзбекнефтгаз” АЖ ва Россия Федерациясининг Нефть ва газ технологик ташаббуслари институти (ИНТИ) билан ҳамкорликда “Техник кун” халқаро конференцияси ташкил этилди.
ЎзА мухбири ушбу анжуманнинг аҳамияти ва томонлар ўртасидаги галдаги режалар хусусида ташкилотчилардан интервью олди.
Феруз Мадатов, “Ўзбекнефтгаз” акциядорлик жамиятининг Ишлаб чиқаришни техник тартибга солиш департаменти бошлиғи:
– Бугун“Техник кун” халқаро анжумани биринчи бор ташкил этилди. “Ўзбекнефтгаз” АЖ ва Россия Федерациясининг Нефть ва газ технологик ташаббуслари институти ҳамкорлигида ўтказилган ушбу тадбирдан кўзланган мақсад мавзу доирасида фикр алмашиш, хориж тажрибасини ўрганиш ва ўзаро мулоқот қилиш орқали фаолиятимиз самарадорлигини оширишга қаратилган.
Таъкидлаш керакки, ташкилотимиз ИНТИ билан ҳамкорлик алоқаларини 2020 йилда бошлаган эди. Шу кунга қадар ҳамкорлик 140 дан ортиқ стандарт кўриб чиқилган. “Ўзбекнефтгаз” АЖ экспертлари томонидан эса 80 та стандарт тасдиқланган. Айни кунларда ушбу стандартлардан 50 га яқинини тизимимизда қўллаш бўйича ишлар олиб борилмоқда.
Анжуманга “Ўзбекнефтгаз” АЖ тизимида фаолият юритаётган техник, механик, энергетик ва метролог мутахассислар, маҳаллий ишлаб чиқарувчилар, ташкилотимиз корхоналарига ускуналар ва қурилмалар етказиб берувчилар таклиф этилди. Шу билан бирга, хорижлик ҳамкорларимиз ҳам қатнашмоқда. Улар учун геологик қидирув, бурғилаш, қазиб чиқариш, қайта ишлаш, босим остида ишловчи аппаратлар, ротацион ва насос ускуналари, энергетика, автоматлаштириш, қурилиш меъёрлари каби 170 дан ортиқ йўналиш ва стандартлар бўйича тақдимотлар ўтказилди.
Бу каби тақдим этилаётган маълумотлар орқали халқаро стандартларни қўллаш ва ишлаб чиқаришга жорий қилиш бўйича иштирокчиларнинг билимини бойитиш, кўникма ҳосил қилиш ва тажриба алмашишга имконият яратдик. Бу бизнинг олдимизга қўйган асосий мақсадимиз эди. Ўйлайманки, бунга биз, ташкилотчилар эришдик.
Николай Кузнeцов, Нефть ва газ технологик ташаббуслари институти бош директори:
– Албатта, бугунги тадбир иштирокчилар учун ҳар жиҳатдан фойдали бўлди. Улар бир-бири билан мулоқот қилиб, яқиндан танишди ва фикр алмашди. Бу тажриба ва кўникма учун қулай муҳит ҳисобланади.
Шу ўринда, Нефть ва газ технологик ташаббуслари институти ҳақида қисқача тўхталиб ўтсам. Ҳозирги кунда институт Россия, Яқин Шарқ ва МДҲ давлатларининг 20 дан ортиқ йирик нефть ва газ компанияларини бирлаштирган. Бугунги тадбирдан кўзланган мақсад “Ўзбекнефтгаз” АЖ билан тўрт йилдан буён йўлга қўйган алоқаларимизни ривожлантиришдир. “Ўзбекнефтгаз” АЖ 2020 йилда институтимиз билан шартнома тузган биринчи хорижий компаниядир. Айни пайтда эса 140 дан ортиқ стандарт биргаликда кўриб чиқилди.
Бугун тадбир доирасида институт ва Ўзбекистон Республикаси ўртасидаги ҳамкорликнинг янги босқичига қадам қўймоқчимиз. Бу нафақат “Ўзбекнефтгаз” АЖ ва Энергетика вазирлигига, балки биз ўз ишимизга Ўзбекистон саноатини, маҳаллий ишлаб чиқарувчиларни ҳам мамлакатингиздаги мавжуд технологияларни, биринчи навбатда Россия, шунингдек, Яқин Шарқ бозорларига экспорт қилиш имкониятига эга бўлиш учун жалб қилмоқчимиз.
ЎзА мухбири Насиба Зиёдуллаева ёзиб олди.