Даромад ҳақида гап кетса, “Америкага борсам эди, ҳаммадан кўп пул топар эдим”, деган хомҳаёлга бериладиганлар кўпайиб бораётгани ҳеч кимга сир эмас. Айниқса, “Грин карта” лотереясини ўйнашга одамларимиз муккасидан кетди.
Тўғри, АҚШ ривожланган мамлакат, у ерда муваффақиятли ишлаётган юртдошларимиз кам эмас. Лекин, доно халқимизнинг “ҳар ерни қилма орзу, ҳар ерда бор тошу тарози”, деган ҳикматини ҳам ёддан чиқармаслик керак.
АҚШга қонуний йўллар билан кетаётганларга ҳеч қандай эътироз йўқ, албатта. Лекин бунинг уддасидан чиқмаган кишилар ҳар қандай йўл билан бўлса ҳам “сеҳрли диёр”га талпинаётгани тушунарсиз. Чунки тўғри йўлни эмас, қинғир йўлни танлаган кўплаб юртдошларимиз бор-будидан ажраб қолаётгани, ҳатто ҳаётидан маҳрум бўлаётгани ҳақида бот-бот айтилмоқда, ёзилмоқда.
Шунга қарамай эгри йўлни танлаётганлар фирибгарлар тегирмонига сув қуймоқда, янада ачинарлиси, ўзларини тузоққа туширмоқда.
Масалан, фуқаро Ф.Э. фуқаро М.Я.нинг ишончига кириб, уни 16 минг АҚШ доллари эвазига Туркия, Мексика ва Никарагуа давлатлари орқали АҚШга ишлаш учун юборишини ваъда қилиб, олдиндан 9 минг АҚШ доллари олган.
Шу вақтда у Бош прокуратура ҳузуридаги Департаментнинг Сергели тумани бўлими томонидан ДХХ ходимлари билан ҳамкорликда ўтказилган тезкор тадбирда ашёвий далиллар билан ушланган.
Бундан олдин Департаментнинг Марҳамат тумани бўлими, ДХХ ва ИИБ ходимлари ҳамкорлигида ўтказилган тезкор тадбирда фуқаро О.У. фуқаро Ф.Б.нинг ишончига кириб, уни гўёки миграция агентлигида ишловчи танишлари ёрдамида Мексика давлати орқали АҚШга ишга юбориши эвазига 15 минг доллар олган вақтида ушланган. Унинг кўрсатмасига асосан давом этган тадбирда бошқа бир фуқаро Н.М. фуқаро О.У.дан 6 минг доллар олган вақтда ашёвий далиллар билан ушланган.
Департаментнинг Чилонзор тумани бўлими томонидан ДХХ ходимлари билан ҳамкорликда ўтказилган тезкор тадбирда фуқаролар К.С., М.О. ва О.З. фуқаро Ш.Ш.нинг ишончига кириб, уни танишлари ёрдамида Европа давлатлари орқали АҚШга юбориши ҳамда виза ҳужжатларини расмийлаштириб беришлари эвазига 32 минг долларини олган вақтларида ашёвий далиллар билан ушланган.
Шунингдек, терговга қадар текширув давомида фуқаро О.З. фуқаро Ш.Ф. ва унинг оила аъзоларини Франция давлатига боришлари учун виза ҳужжатларини олиб бериши эвазига 3,9 минг долларини фирибгарлик йўли билан ўзининг виза картасига ўтказиб олгани аниқланган.
Департаментнинг Самарқанд вилояти бошқармаси томонидан ДХХ ва ИИБ ходимлари билан ҳамкорликда ўтказилган тезкор тадбирда фуқаро С.С. фуқаро М.А.ни 18 минг доллар эвазига Туркия, Қатар ва Мексика давлатлари орқали АҚШга ўтказиб қўйишни ваъда қилиб, шундан ярмини олган вақтда ашёвий далиллар билан ушланган.
Мазкур ҳолатлар юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят ишлари қўзғатилиб, тергов ҳаракатлари ўтказилмоқда.
Эслатиб ўтамиз, 2023 йил давомида жиноят ишлари бўйича судлар томонидан 58,5 мингга яқин жиноят иши кўриб чиқилган бўлса, бунда айнан фирибгарлик жинояти етакчилик қилган.
Норгул Абдураимова, ЎзА