Бугунги кунда дунёдаги 221 давлатда коронавирус инфекциясидан зарарланган кишилар сони 703,8 миллион нафарга етди. Улардан 7 миллиондан ортиғи вафот этди. Сўнги кунларда бир сутка ичида 7-10 мингта янги касалланиш ҳолатлари қайд этилмоқда.
Ўзбекистон Республикаси билан чегарадош бўлган Қозоғистонда 1,4 млн. Афғонистонда 231,5 минг, Қирғизистонда 206,9 минг, Тожикистонда 17,8 минг ҳолатда коронавирус касаллиги рўйхатга олинган.
2024 йил 1 март ҳолатига Ўзбекистонда касалланиш 261 085 нафарга етди, соғайиш 99,1 фоизни ташкил қилмоқда. 1637 нафар (0,06 фоиз) фуқаро ушбу касалликдан вафот этган. Бу ҳақда Санитария-эпидемилогик осойишталик ва жамоат саломатлиги қўмитаси раисининг биринчи ўринбосари Нурмат Отабеков АОКАда ўтказилган брифингда маълумот берди.
Таъкидланишича, касалликнинг тарқалганлик даражаси 1 ни ташкил этмоқда. ЖССТ экспертлари хулосасига кўра, бу кўрсаткич 1 гача бўлса вазият барқарорлигини англатади.
Касалликнинг юқтириб олиш манбаи 35-43 фоиз ҳолатда касалланган оила аъзоси ёки қариндошлари, 6-7 фоиз ҳолатда бемор қўшнилари, 10-12 фоизи ҳолатда жамоат жойларидаги мулоқот, 4-5 фоиз ҳолатда иш жойидаги мулоқот эканлиги аниқланмоқда.
– Вирус геномини ўрганиш (секвенлаш) бўйича ўтказилган сўнгги таҳлилларнинг 100 фоизида “омикрон” штамми аниқланган, – дейди Н.Отабеков. – Бутун дунёда COVID-19га қарши курашишнинг энг самарали усулларидан бири сифатида унга қарши вакциналар билан эмлаш, деб қаралмоқда. Республикада COVID-19ra қарши эмлаш жараёни учун жами 86,6 млн. доза вакцина олиб келинди ва ишлаб чиқарилди. Бугунги кунга қадар 85,2 млн. доза вакцина қўлланилди.
Шундан, тўлиқ вакцина курсини олганлар – 18,1 млн. нафар (режага нисбатан – 78 фоиз), бустер доза олганлар – 18,6 млн. нафар (режага нисбатан – 80 фоиз), ревакцинация қилинганлар– 14,7 млн. нафарни ташкил этди.
Ҳозирда, Санитария-эпидемилогик осойишталик ва жамоат саломатлиги қўмитасининг вакцина сақлаш омборхоналарида Johnson & Johnson ва Pfizer-BioNTeсh вакциналари захираси мавжуд.
Шунингдек, брифингда қизамиқ бўйича эпидемиологик вазият ҳақида ҳам маълумот берилди.
– Қизамиқ касаллигига шубҳа қилинган шахслар билан алоқада бўлганлар эпидемиологик кўрсатма асосида профилактик эмлаш билан қамраб олинди, – деди Н.Отабеков. – Республикамизнинг барча ҳудудларида қизамиқ ва қизилчанинг олдини олиш бўйича қатор тренинглар ва семинарлар ўтказилди. 9 500 нафар тиббиёт ходими қизамиқ-қизилча касаллигини эпидемиологик назорат қилиш, иммунопрофилактика тадбирларини ўтказиш бўйича ўқитилди. Бирламчи тиббий муассасаларда қизамиқнинг олдини олиш бўйича 120 000 та рисола чоп этилди ва тарқатилди. Иш режасига асосан маҳаллаларда 10 230 та, боғча ва мактабларда 7 985 та, соғлиқни сақлаш муассасаларида 3 793 та қизамиқ касаллиги ҳақида ва қизамиққа қарши эмлаш бўйича учрашувлар ташкил этилди.
2023 йил давомида қизамиққа қарши жами 1 575 558 нафар бола миллий эмлаш календарига мувофиқ эмланди. Улардан 879 314 нафари 1 ёшдаги ва 696 244 нафари 6 ёшдаги болалар КПК вакцинаси билан режа асосида эмланди.
2 444 439 нафар аҳоли эса эпидемик кўрсатма бўйича КК (қизамиқ +қизилча) вакцинаси билан эмланган бўлса, жорий йилнинг ҳозирига қадар жами 123 534 нафар бола миллий эмлаш календарига мувофиқ эмланди.
Моҳигул Қосимова, ЎзА