Қорақалпоғистон Республикаси Жўқорғи Кенгеси Раиси А.Оринбаев янги йил байрами арафасида бир гуруҳ спортчилар ва уларнинг мураббийлари билан учрашди.
Учрашувда Жўқорғи Кенгес Раиси Президентимиз раҳбарлигида сўнгги йилларда мамлакатимизда “Инсон қадри учун” деган эзгу ғоя асосида кўплаб ишлар амалга оширилаётгани, халқимизнинг фаровон ҳаётини таъминлаш борасида бир қанча амалий ишлар бажарилаётганини таъкидлади. Шу жумладан, барча йўналишлар қаторида жисмоний тарбия ва спортни ривожлантиришга алоҳида эътибор қаратилиб, бу бўйича кенг кўламли ишлар бажарилаётгани қайд этилди.
Ўтган 5 йил давомида фақатгина спортни ривожлантириш учун 416 та объект янгидан қурилиб, бугунги кунда уларнинг сони 3 минг 604 тага етди. Шу билан бирга, жорий йилда бир қатор спорт объектларида қурилиш ишлари олиб борилди. Ёшлар орасида оммавий спортни кенг тарғиб қилиш мақсадида 7,8 миллиард сўмлик 41 та спорт майдончаси қурилиб, фойдаланишга топширилди. Жўқорғи Кенгес Президиумининг алоҳида қарори асосида спорт беллашувларини ўтказиш учун 3,2 миллиард сўм ва спортчи ёшларнинг вақтида витаминизация билан таъминланиши ва вазн сақлаши учун 1,4 миллиард сўм миқдорида маблағ ажратилди. Бундай яратилаётган шароитлар спортчиларимизни янгидан-янги муваффақиятлар сари етакламоқда.
Шу билан бир қаторда футболни ривожлантириш, “Арал” ва “Жайхун” клубларини қўллаб-қувватлаш учун жорий йилда маҳаллий бюджет ҳисобидан 7 миллиард сўм маблағ ажратилди. Келгуси йил учун ҳам бир қатор режалар белгилаб олиниб, бу йўналишда 2024 йилги инвестиция дастури доирасида жами 4 та спорт объектида 52.2 миллиард сўмлик қурилиш-таъмирлаш ишларини амалга ошириш режалаштирилган.
Учрашувда бир гуруҳ спортчилар ва уларнинг устозлари тақдирланди. Жумладан, Хитойнинг Ханчжоу шаҳрида ўтказилган 19-ёзги Осиё ўйинларида Ўзбекистон терма жамоаси таркибида 3 та олтин ва 4 та бронза медалини қўлга киритган спортчиларга қимматбаҳо совғалар топширилди. Шу билан бир қаторда, шу йилнинг 4-14 август кунлари Беларуснинг Минск шаҳрида бўлиб ўтган Мустақил давлатлар ҳамдўстлик кенгаши ўйинларида муносиб иштирок этган спортчилар ҳам тақдирланди.
Довуд Абибуллаев,
ЎзА мухбири