Янги йил байрами арафасида Қорақалпоғистон Республикаси Вазирлар Кенгаши раиси Ф.Эрманов, Шимоли-ғарбий ҳарбий округ қўшинлари қўмондонининг биринчи ўринбосари, полковник Д.Илҳомов, Нукус шаҳар ҳамда Тўрткўл тумани ҳокимликлари, Мудофаа ишлари бошқарма ва бўлимлари ҳамда кенг жамоатчилик вакиллари Иккинчи жаҳон урушида фашизм устидан қозонилган буюк ғалабага беқиёс ҳисса қўшган Нукус шаҳрида истиқомат қилаётган Қодирбой Норманов, Мария Карнишина ва тўрткўллик 99 ёшли Иван Галенко хонадонида бўлди.
Уруш фахрийларига Ўзбекистон Республикаси Президентининг Иккинчи жаҳон уруши қатнашчиларига йўллаган Янги йил байрами табриги ўқиб эшиттирилди, уларга совға-саломлар ва моддий ёрдам, бирламчи озиқ-овқат маҳсулотлари берилди.
Таъкидланганидек, Иккинчи жаҳон уруши миллионлаб инсонларнинг бевақт ўлимига, катта йўқотишларга сабабчи бўлган тарихдаги энг даҳшатли қонли қирғинлардан бири сифатида муҳрланиб қолди. Урушда 66 минг нафар қорақалпоғистонлик иштирок этган ва улардан 34 минг нафари жанггоҳларда ҳалок бўлган. Қорақалпоғистондан фронтга сафарбар этилган 14 мингдан зиёд юртдошимиз жанговар хизматлари учун давлат мукофотлари билан тақдирланган. Бугунги дориломон кунларда қорақалпоғистонлик 3 нафар Иккинчи жаҳон уруши қатнашчиси умргузаронлик қилиб келмоқда.
Кексайиб қолган отахон-онахонлар бугунги тинчлик ва осойишталик учун миннатдорчилик билдирди. Фахрийларнинг уруш йилларида кўрсатган мардлик ва жасорати улуғланди.
Довуд Абибуллаев, ЎзА мухбири