Қорақалпоғистон Республикаси Aхборот-кутубхона марказида “INFOLIB UZBEKISTОN – 2023” XII миллий ахборот-кутубхона ҳафталиги якунига бағишланган тадбир бўлди.
– Мазкур ҳафталик мутолаа маданиятини ривожлантириш, соҳада амалга оширилаётган кенг кўламли ишларни китобхонларга яқиндан таништириш, аҳолини, шу жумладан, ёшларни зиё масканларига жалб қилишда муҳим аҳамиятга эга бўлди, – дейди Қорақалпоғистон Республикаси Aхборот-кутубхона маркази директори ўринбосари Зибагул Сапарова. – Унинг доирасида Ахборот-кутубхона маркази ва ўқув юртларида китоб кўргазмалари, тақдимотлар, викторина ўйинлари, ёзувчи ва шоирлар билан учрашувлар, давра суҳбатлари ташкил этилди.
Буюк аллома Абу Райҳон Беруний таваллудининг 1050 йиллигига бағишланган “Қомусий асарлар яратувчиси”, “Ёшлар ўртасида ҳуқуқбузарликлар ва жиноятчиликнинг олдини олиш, уларни бир мақсад сари бирлаштириш, китоб ўқишга бўлган қизиқишини ошириш, экстремизм ва терроризмга қарши курашиш, шунингдек, яна бошқа ёт иллатларнинг олдини олиш бўйича тарғибот ишларини кучайтириш” мавзуларида тақдимот маросимлари, покистонлик ёзувчи, Нобель мукофоти совриндори Малала Юсуфзайнинг “Мен Малаламан” китобидан “Малала монологи” мавзусида кўрик-танлов, китобхонлар томонидан кўп сўралган китобларни ифодали ўқиш, қисса воқеаларидан савол-жавоблар ўтказилди.
Қорақалпоғистон халқ шоири, Бердақ номидаги давлат мукофоти совриндори Аббаз Дабилов таваллудининг 125 йиллигига бағишланган “Поэзия гулдастаси”, “Шуҳрат” медали соҳиби, Ўзбекистон Республикаси Фанлар академияси Қорақалпоғистон бўлими бош илмий котиби, кимё фанлари доктори, профессор Шарибай Туремуратов билан “Илм-фан ва таълим арбоби”, ёш шоирлар билан “Шеърият юлдузлари” мавзуларида учрашув кечалари, “Халқ оғзаки ижодида аёллар тимсоли”, “Aхборот технологиялари асрида кутубхона кадрларини тайёрлашнинг долзарб вазифалари” мавзуларида давра суҳбатлари, “Шахсий ривожланиш асослари”, “Aхборот-кутубхона фондларини хатловдан ўтказиш, қайта баҳолаш: муаммо ва ечимлар” мавзуларида ўтказилган семинарлар иштирокчиларда катта таассурот қолдирди.
Бундан ташқари, ҳафталик доирасида кутубхона бўйлаб экскурсиялар, китоблар кўргазмалари ҳамда турли нашриётларда чоп этилган китоблар тақдимоти каби қизиқарли тадбирлар ўтказилди.
Довуд Абибуллаев, Мақсад Ҳабибуллаев (сурат),
ЎзА мухбирлари