«Дийдор» ёшлар экспериментал театр-студияси ижодкорлари қўшни Қозоғистон Республикасининг Туркистон шаҳрида ўтказилаётган «Кўча театрлари халқаро фестивали»да драматург Ҳамза Ҳакимзода Ниёзийнинг «Майсаранинг иши» спектакли билан иштирок этмоқда.
Фестивалда Туркия, Қозоғистон, Қирғизистон давлатларининг ўн битта театри қатнашмоқда.
«Майсаранинг иши» спектаклини саҳналаштирувчи режиссёр Руслан Ҳайдаров фестиваль ташкилотчиларига спектакль хусусида маълумот берди. Жумладан, ушбу спектаклнинг ўзига хос жиҳати уни саҳнада ҳам, кўча томошаси сифатида очиқ майдонда ҳам томошабин эътиборига ҳавола қилиш мумкин. Вақт нуқтаи назардан у томошабинни зериктирмай, яхлит ғоявий ечимнинг моҳиятини англашга ундашини билдирди.
«Дийдор» театр-студиясининг директори Анвар Толипов театрнинг фестивалларда иштирок этиши ижодий жараённи ривожлантиришга кенг йўл очишини, туркий давлатлар ўртасидаги маданий алоқаларни мустаҳкамлашга ёрдам беришини, ўзбек театр санъатини такомиллаштириш ва янги ғояларни саҳнада татбиқ этиш жараёнида маданият вазирлиги доим инновацион таклифларни қўллаб-қувватлаётганини таъкидлади.
Айтиш жоизки, «Дийдор» театр-студиясининг спектакллари наинки мамлакатимиз, балки бир қатор хорижлик санъат мухлисларининг эътирофига сазовор бўлган.
Н.Усмонова, ЎзА