Туркия Президенти Режеп Таййип Эрдоған Исроил Бош вазири Биньямин Нетаньяху билан ўзаро икки томонлама ташриф буюришга келишиб олди. Бу ҳақда Эрдоған Нью-Йоркда турк журналистларига шундай деди:
– Нетаньяху хасталик туфайли аввалдан режаланган ташриф билан Туркияга кела олмаган эди. Уни қайта мамлакатга таклиф қилдим. Кейин мен ҳам делегация билан Исроилга бораман, дедим. Хуллас, келишиб олдик.
Унинг сўзларига кўра, ташрифларни кечиктирмасдан амалга ошириш керак. Исроил билан энергия ресурслари соҳасида қазилма ишларини бошлаш керак.
“Анадолу” агентлиги хабарида Эрдоған “Исроил билан энергетика соҳасидаги ҳамкорлик мамлакатларимиз ўртасидаги кўпгина муаммоларни ечишга хизмат қилади, энергия ресурсларини Туркия орқали Европага ташиш имкони яратилади”, деган.
Учрашув чоғида халқаро сиёсий ҳамкорлик истиқболи ҳам кўриб чиқилган.