Ҳар қандай спорт турининг энг муҳим мусобақаси бу — жаҳон чемпионати. Унда ғалаба қозониш, Ватан байроғини юксалтириш орқали шарафга эришиш ҳар бир спортчининг орзуси. Бундай бахт миллионлаб спортчилар орасида саноқлиларгагина насиб этади.
Сербия пойтахти Белград шаҳрида спорт курашлари бўйича катталар ўртасида давом этаётган жаҳон чемпионати ана шундай истакни қалбига жо этганлар ўртасидаги шиддатли курашларга бойлиги билан ажралиб турибди.
Бошланганига тўрт кун бўлган жаҳон чемпионати эркин курашчиларимиз учун поёнига етди.
Терма жамоамиз аъзоларидан Токио Олимпиадаси совриндори Бекзод Абдураҳмонов, Олимпия ўйинлари иштирокчиси Ғуломжон Абдуллаев, ўсмирлар Олимпиадаси ғолиби Умиджон Жалолов, Рио Олимпиадасининг бронза медали совриндори Магомед Ибрагимов саралаш баҳсларини муваффақиятли ўтказган ҳолда асосий босқичларда имкониятни бой бериб қўйди. Шунингдек, терма жамоамиз аъзоларидан Жаҳонгирмирза Туробов, Зафарбек Отахонов, Сардорбек Холматов илк босқичдаёқ томошабинлар сафидан жой олди.
Мамлакатимиз шарафини ҳимоя қилаётган эркин курашчиларимиздан Жавраил Шапиев 86 килограммлилар беллашувида анча омадли иштирок этди. Шапиев 1/16 финалда польшалик Себастьян Йезирзански (4-1), 1/8 финалда туркиялик Осман Госен (11-0), чорак финалда япониялик Ҳаято Ишигурони мағлубиятга (15-5) учратди. Ярим финалда эса эронлик Ҳассан Язданичаратига йўл берди. Олимпиада йўлланмаси учун ташкил этилган беллашувда Баҳрайн спортчисидан устун келиб, фаолиятида иккинчи бор Олимпия ўйинлари йўлланмасини қўлга киритди.
Бугун, 19 сентябрь куни жаҳон чемпионатининг аёллар кураши баҳсларида Ўзбекистон терма жамоасининг уч нафар аъзоси медаллар ҳамда “Париж-2024” Олимпиадаси йўлланмаси учун курашга киришади. Курашчи қизларимиздан Жасмина Иммаева илк баҳсда россиялик Полина Лукина билан рўбарў келса, Лайлохон Собирова Айнур Ашимова (Қозоғистон) билан, Светлана Окназарова украиналик Анастасия Алпеева билан куч синашади.
Шу ўринда айтиш лозим, эркин курашчиларимиз учун “Париж-2024” Олимпиадасининг йўлланмаларини қўлга киритиш имконияти ҳали сақланиб қолмоқда. Улар келаси йилнинг 12-14 апрель кунлари Қирғизистоннинг Бишкек шаҳрида ўтадиган Осиё саралаш турнири ва 9-12 май кунлари Туркиянинг Истанбул шаҳрида ташкил этиладиган Жаҳон саралаш турнири орқали “Париж-2024” Олимпиадаси йўлланмасини қўлга киритиши мумкин.
Эслатиб ўтамиз, дунёнинг 70 га яқин давлатидан эркин, юнон-рум ва аёллар кураши спорт жамоалари қатнашаётган жаҳон чемпионати беллашувлари 26 сентябрга қадар давом этади.
Т.Рўзиев, ЎзА