Республикамиз бўйлаб барча ҳудудларда 6 сентябрдан 30 сентябрга қадар ёшлар ўртасида Сардорлар сайловлари бўлиб ўтади. Ўзбекистон ёшлар иттифоқи ахборот хизматининг маълумотларига кўра, сайловда иқтидорли, билимли ва шижоатли, айниқса, тенгдошларини бир мақсад йўлида бирлаштира оладиган хоҳлаган ёшлар фаол иштирок этишлари мумкин.
Сайловлар 5 босқичда амалга оширилади. Жумладан, биринчи босқич – синф сардорлари сайлови 6-9 сентябрь, иккинчи босқич – мактаб сардорлари сайлови 11-16 сентябрь, учинчи босқич – туман ва шаҳар сардорлар сайлови 18-23 сентябрь, тўртинчи босқич – Қорақалпоғистон Республикаси, вилоятлар ва Тошкент шаҳар сардорлар сайловлари 25-30 сентябрь ҳамда бешинчи босқич – Республика Сардорлар кенгаши аъзолари сайлови навбатдаги Республика сардорлар форуми доирасида ўтказилади.
Ёшларимиз сайлов жараёнларининг ташкил этилиши ва ўтказилиши юзасидан батафсил маълумотларни Ўзбекистон ёшлар иттифоқининг ҳудудий Кенгашлари орқали олишлари мумкин.
Гулноза Бобоева,
ЎзА