Туркия парламентининг асосий вазифаларидан бири 1980 йилдаги ҳарбий тўнтаришдан кейин қабул қилинган амалдаги конституцияни янгисига алмаштириш бўлади. Бу ҳақда давлат раҳбари Режеп Таййип Эрдоған ҳуқуқ идоралари вакиллари билан учрашувда айтиб ўтган.
“Анадолу” агентлиги ёзишича, мазкур ташаббус парламентнинг куздаги сессиясида кўриб чиқилади.
“Биз 2011 йилдан бери “тўнтариш конституцияси”дан воз кечишни режалаб келамиз. Янги Асосий қонун 85 миллионлик фуқароларимизнинг ҳуқуқи ва эркинлиги ҳимоясига қаратилади. Кузги сессия бошланиши билан янги конституцияга оид ташаббусни кўриб чиқиш учун парламентга киритамиз. Сиёсий партиялар, судлар, университетлар, давлат идоралари ва барча фуқароларни жараёнга муносиб ҳисса қўшишга чақираман”, деган етакчи.
Президент аввал ҳам икки марта конституцияга тузатиш киритиш масаласини халқ муҳокамасига олиб чиққан.
2017 йил референдум орқали республикадаги парламент тизими президентлик тизимига ўзгартирилган.