АҚШ собиқ Президенти Дональд Трамп ўз тарафдорларига мурожаатида уч жиноий иш бўйича унга жами 561 йиллик қамоқ жазоси берилиши мумкинлигини айтди.
“Эгри Жо (Трамп Президент Байденни шундай атайди)нинг коррупцияга учраган Адлия вазирлиги менга қарши яна ноқонуний айблов қўймоқда. Маълумотга кўра, сўлчиларнинг жодугарга қарши ови натижасида мени жами 561 йиллик қамоқ жазоси кутмоқда. Бу бир инсоннинг олти ҳаёти, дегани. Кимнингдир бировни олти умрлик қамоқ жазосига маҳкум этмоқчи бўлиши унинг саросимага тушиб қолганини кўрсатади”, мазмунидаги баёнотни тарқатди Трамп сайлов олди қароргоҳидан.
Собиқ етакчи ўз тарафдорларини “Американинг тобора зулм ботқоғига кириб кетаётган тиранларига қарши вазминлик билан кураш” кампаниясига қўшилишга чақирди. АҚШ сиёсатида кенг тарқалган амалиёт сифатида унинг кампаниясига хайрия қилишни таклиф этди.
“Агар сиз Жо ва Вашингтон ботқоғи амалдорлари сиёсати туфайли молиявий қийинчиликка дуч келган бўлсангиз, хайрия ҳақида ўйламанг”, дея қўшимча қилган Трамп.
Куни кеча Трампга қарши 2021 йил 6 январда Капитолияга уюштирилган ҳужум муносабати билан айблов эълон қилинди. Аввалроқ унга молиявий фирибгарлик ва махфий ҳужжатлар билан нотўғри муносабатда бўлиш айби қўйилган эди.